18.01.2013, 11:56 Шпанија ја „нанижа“ и Унгарија
Домаќинот на мундијалот подобар од полуфиналистот на ОИ во Лондон со 28:22
Околу 12.000 гледачи во „Каха махика“ во Мадрид, меѓу кои и шпанскиот престолонаследник, принцот Фелипе, ја прославија победата на домаќинот над Унгарија од 28:22 во дербито на четвртото коло во групата Б на Светското првенство за ракометари. Триумфот над олимпискиот полуфиналист е четврти во четвртиот настап на „фуријата“ на мундијалот, што и' гарантира едно од првите две места во групата, а Унгарците останаа на четири бода.
Првото полувреме заврши нерешено 14:14, иако Унгарија во два наврата имаше по два гола предност (9:7 и 10:8 во 18. минута), најмногу по заслуга на бековите на чело со ексракометарот на Барселона, Ласло Наѓ. Но, десното крило Алберт Рокас и голманот А��пад Штербик ја одржаа резултатската рамнотежа, а со играта еден на еден во одбраната против Наѓ во вториот дел Шпанците се одвоија на 19:16. Унгарците се доближија на 19:20, по што наидоа на ѕид во шпанската одбрана, па домаќинот со серија од 7:1 поведе со недостижни 26:20 и го реши победникот. До крајот на мечот публиката се забавуваше со правење „бранови“ на трибините.
В сабота е „натпреварот на сите натпревари“ за Шпанија против освојувачот на бронзениот медал на Олимпијадата во Лондон, Хрватска.
Резултати од четвртото коло во групата Ц: Словенија – Белорусија 27:26, Саудиска Арабија – Јужна Кореја 24:22, Полска – Србија 25:24. Табела: Словенија 8, Србија 6, Полска 6, Белорусија 2, С. Арабија 2, Ј. Кореја 0. Последно коло, сабота: Белорусија – С. Арабија (15,45 ч.), Полска – Ј. Кореја (18 ч.), Србија – Словенија (20,15 ч.).
Група Д, четврто коло: Австралија – Алжир 15:39, Унгарија – Шпанија 22:28, Хрватска – Египет 24:20. Табела: Шпанија 8, Хрватска 8, Унгарија 4, Алжир 3, Египет 1, Австралија 0. Последно коло, сабота: Египет – Австралија (16,45 ч.), Шпанија – Хрватска (19 ч.), Унгарија – Алжир (21,15 ч.). (Р.Д.)
|
