Виланова го „чепна“ Мурињо

„Јас ќе бев избркан доколку Барса заостануваше 18 бода зад Реал“, рече стратегот на Каталонците

Тренерот на Барселона, Тито Виланова, вели дека сигурно не би бил на клупата на каталонскиот гигант доколку неговиот тим има заостанување од 18 бода зад лидерот, како што е сега ситуацијата со Реал Мадрид во однос на најголемиот ривал. Барселона има 18 бода пред „кралскиот клуб“, кој засега не размислува да го избрка тренерот Жозе Мурињо.

„Доколку Барселона имаше 18 бода помалку од Реал Мадрид, сигурно немаше да бидат тука и да одговарам на новинарски прашања“, рече Виланова за актуелната ситуација во Примера дивисион.

Барселона под водство на Виланова ја игра најдобрата сезона во историјата. На точно половина од првенството во каталонскиот гигант има освоено 55 од можните 57 бода досега, победувајќи 18 пати, а само еднаш ремизираше, додека се' уште нема ниту еден пораз. За разлика од Барса, актуелниот првак Реал Мадрид е на третото место со дури седум бода помалку од второпласираниот Атлетико Мадрид. И покрај големата предност стратегот на лидерот не сака уште сега да се радува на титулата.

„Сигурно дека може да се случи Реал да победи на сите мечеви до крајот на првенството, а ние да загубиме бодови. Затоа се' уште велам дека ништо не е готово. Има уште многу да се игра сезонава, како во првенството така и во Купот на Шпанија, но и во мечевите од Лигата на шампионите“, заврши Виланова.