16.01.2013, 12:16 Македонија против една нова Русија
Русите на стартот убедливи против Исланд, а потоа изгубија по голема борба од европскиот првак Данска
РОБЕРТ ДИМИТРИЕВСКИ
Русија не е тоа што беше - подобра е. Ако некој има(ше) илузии дека Македонија има макар и мала предност на хартија во денешниот натпревар од 15,45 часот во рамките на третото коло од групата Б на 23. Светско првенство за ракометари во Шпанија, ќе мора да се преиспита. Оптимизмот црпен од фактот дека Македонија беше петта, а Русија претпоследна на Европското првенство 2012 во Србија или од победата со 36:30 во меѓусебниот дуел на мундијалот во Хрватска 2009 значително еродира кога ќе се соочи со настапот на Русите во Шпанија досега. „Зборнаја“ почна со уверлива победа од 30:25 над Исланд, а во второто коло по голема борба загуби од европскиот шампион Данска со 31:27.
„Русија игра побрзо, попаметно, а не како што беше во минатото. Тие можат да стигнат далеку на ова првенство, како и на наредните“, смета данскиот селектор Улрик Вилбек. „Играат неверојатно брз ракомет, побрзо од нас, со повеќе контранапади“.
Од новиот лик на руската селекција е фасциниран и македонскиот селектор Звонко Шундовски.
„Русија е екипа што најмногу напредуваше во овој период. Имаат нов селектор и двајца натурализирани играчи. Играта и пристапот им се поинакви, сега се побрзи, имаат повеќе решенија. Според мене, тие се меѓу главните фаворити за висок пласман на ова СП“, вели Шундовски.
Новите ветришта во рускиот машки национален тим почнаа да дуваат со доаѓањето на кормилото на поранешниот репрезентативец Олег Кулешов (38). Тој стапи на функцијата по дебаклот на ЕП во Србија, на кој му претходеше историската хаварија во баражот за СП 2011 во Шведска, кога беа елиминирани од Романија и првпат во 60-годишната историја на руската (советската) репрезентација останаа без настап на големо натпреварување. Одговорноста ја понесе тогашниот селектор Владимир Максимов, кој продолжи како тренер во првакот Чеховски медведи, од кој доаѓаат деветмина од 16 играчи од рускиот ростер на ова СП. Кулешов дебитира на клупата со две победи над Чешка во мундијалскиот бараж, а неговите избраници успешно ги почнаа и квалификациите за ЕП 2014 во Данска.
Рускиот состав го сочинуваат повеќемина ракометари високи околу два метра, но многу подвижни. Високи по 201 см се голманот Олег Грамс, крилото Егор Евдокимов и бекот Алексеј Растворцев, а меѓу џиновите се издвојува пикерот Михаил Чипурни (190 см и 110 кг). Носители на играта се и крилото Тимур Дибиров и бекот Константин Игропуло, но ѕвезда на бековската линија е натурализираниот Белорусин Сергеј Горбок.
Во однос на последната меѓусебна пресметка пред четири години во Вараждин во рускиот тим се' уште се шестмина, а во македонскиот деветмина.
|
