Катастар: Редовите за имотен лист ќе станат минато

За еден месец општините, геодетските фирми и нотарите издале околу 1.000 имотни листа во име на Агенцијата за катастар на недвижности, преку новата апликација „и-кат“ што раководството на Катастарот денеска ја презентира пред премиерот Никола Груевски и министерот за транспорт и врски Миле Јанакиески. Катастарот, според најавите, во иднина ќе функционира како берза на недвижности и ќе воспостави регистар на градежно земјиште.

„Во тест-периодот за еден месец склучивме 91 договор и издадовме над 970 имотни листа. Наместо да дојдат во Катастар, граѓаните го вадат имотниот лист веќе кај нотар, геодет или во општина. Интересот е голем и секој ден пристигнуваат нови барања. Упатуваме повик до сите општини, нотари и геодетски компании да се приклучат на овој систем“, изјави по средбата директорот на Агенцијата за катастар на недвижности, Славче Трпевски.

Новата апликација, како што појасни, веќе функционира во целата држава. Имињата на овластените општини, геодети и нотари за издавање имотни листови се објавени во Агенцијата за катастар на недвижности.

Откако ќе бидат изгласани законските измени, Агенцијата до средината на годинава ќе изготви софтвер со кој наесен ќе се внесуваат првите детални урбанистички планови. На тој начин државата ќе добие јасна евиденција колкаво е вкупното градежно земјиште и колку од него е изградено. (Ек.Р.)