Грција постави свои услови до еврокомесарот

Аврамопулос во одговорот до Филе вели дека го чека исходот од новите разговори во Њујорк и не размислува за трилатерална средба

Од нашиот дописник
Миркица Поповиќ

Атина – Грција не го одбива директно предлогот на еврокомесарот Штефан Филе за нова рамка и трилатерална средба, но јасно посочува свои услови за предлозите на еврокомесарот. Шефот на грчката дипломатијата Димитрис Аврамопулос во одговорот до Филе посочува дека во моментов кога се исчекува исход од новите средби во Њујорк со медијаторот Метју Нимиц не се размислува за трилатерална средба, но дека во суштина Грција не е против вакви сре��би, под услов тие да се добро подготвени и да донесат суштински резултати.

Аврамопулос ја прифаќа делумно понудата на Филе за директен увид во преговорите, со коментар дека Грција ќе работи на подобрување на комуникацијата меѓу Министерството и Комисијата за да и' обезбеди суштински информации за напредокот на преговорите.„Во следниот период треба да се проценат и искористат целосно каналите на комуникација меѓу раководителите во грчкото Министерство за надворешни работи и Комисијата, за комисијата да биде суштински информирана за текот на преговорите во рамки на Обединетите нации, затоа што решавањето на спорот за името е предуслов за почеток на пристапни преговори на БЈРМ со ЕУ“, пишува Аврамопулос до Филе.

Во соопштението од грчкото Министерство во врска со предлогот на Филе за средба на која ќе се разговара и ќе се поттикне грчката иницијатива за потпишување Меморандум за соработка меѓу двете држави, се потенцира дека Грција во суштина не е против вакви средби под услов за нив да има добра подготовка и средбите да донесат суштински резултати.

Грчкиот министер индиректно во писмото потенцира дека преговарачкиот процес за името на ниту еден начин не е поврзан со Европската комисија, со што отфрла да се подели штафетата на влијанието за преговорите меѓу Нимиц и Филе. „Суштината на преговарачкиот процес под медијаторот Метју Нимиц, кој се активираше благодарение на грчката иницијатива, не е поврзан на никаков начин со Европската унија и нејзините органи, туку е формиран врз основа на одлуките на Советот за безбедност на ОН“, стои во соопштението.

Писмото на Филе заедно со најавата за нова средба на медијаторот Метју Нимиц со преговарачите во Њујорк во Атина се толкува како сигурен знак дека се зголемува притисокот на двете страни за да има некаков напредок кој ќе доведе до позитивен пролетен извештај на Комисијата за Македонија. Дипломатски извори од Грција коментираат дека јануарските изјави на оптимизам на Нимиц во суштина не се разликуваат од сите негови претходни изјави од минатите години.

Претпоставките меѓу грчките аналитичари се дека Нимиц со ова динамизирање на преговорите можеби се обидува да создаде слика дека има поинтензивни разговори, средби и можност за напредок во пресрет на пролетниот извештај на Комисијата, се' со цел извештајот за Македонија да биде позитивен. „Извештајот ќе биде клучот кој ќе ја отвори вратата кон нов развој и динамика и за спорот за името и за европската перспектива на вашата држава“, коментираат аналитичари.