СДСМ најавува поголеми блокади

Коалицијата „Сојуз на иднината“ предводена од опозициската СДСМ и натаму ги блокира на крстосниците низ Скопје. Денеска во времетраење од половина час беше блокирана крстосницата кај Владата на Република Македонија.

На протестот кој беше пред Владата, помеѓу мостот „Гоце Делчев“ и централата на „Македонски пошти“, пратеникот на СДСМ и кандидат за градоначалник на Скопје Јани Макрадули, рече дека секој ден опозицијата ќе блокира по една раскрсница, а тоа ќе трае се' додека трае игнорантскиот однос на власта.

„Свесни сме дека граѓанскиот отпор и блокадите предизвикуваат непријатности и можеби нервоза кај некои скопјани, но во оваа прилика сакаме да повикаме на трпение, имајќи предвид дека отпорот е против режим кој секојдневно ја инсталира својата диктатура и ја укинува слободата на граѓаните. Сакаме јасно да порачаме дека оваа форма на блокирање на само една раскрсница во времетраење од половина час е само предупредување кое завршува во петок. Доколку власта не покаже добра волја за дијалог и излез од политичката криза, од понеделник овие блокади ќе се зголемуваат како по бројност така и по времетраење“, рече Макрадули.

Триесетминутен протест на здружената опозиција е закажан за утре на пладне на раскрсницата во близина на Тутунскиот комбинат во Скопје. За вечерва е закажан марш во Струмица. (П.Р.)