Фијат Цаноски седи до Црвенковски, а мисли на Ахмети

Демантот на ПЕИ дека не го напушта СДСМ не дава одговор на дилемата дали ќе ја почитува евентуалната одлука за бојкот на изборите, со оглед на тоа што веќе договара изборен настап со други партии

Татjана Поповска

Ќе ја напушти ли партијата на Фијат Цаноски (ПЕИ) коалицијата со СДСМ доколку постигне договор со ДУИ за поддршка на нивниот кандидат за градоначалник на Струга во замена за градоначалничкото место во Маврово Ростуше, е дилемата што се појави по информациите дека двете партии преговараат, но дека се' уште немаат постигнато догов��р за предизборна поддршка.

Иако вчера ги демантираа информациите дека ја раскинуваат соработката со Бранко Црвенковски, од ПЕИ потврдија дека во тек се преговори со ДУИ, од кои се' уште нема конкретен резултат. Неофицијално двете партии преговарале за меѓусебна поддршка во Струга, каде што заеднички кандидат би им бил интегративецот Арбен Лабеништа, во замена за поддршка на кандидатот на ПЕИ во Маврово Ростуше. Потврда за преговорите стигна и од ДУИ, од каде што се оптимисти дека деновиве ќе се постигне конечен договор.

Соопштението на ПЕИ во кое се вели дека не ја напуштаат коалицијата со СДСМ не дава одговор и на дилемата дали ПЕИ ќе ја почитува одлуката на СДСМ и на нејзините коалициски партнери за бојкот на изборите, со оглед на тоа што веќе договара изборен настап со други партии.

„Точно е дека изминатиов период имавме разговори со неколку политички партии од албанскиот блок, во општините во кои ПЕИ го има поголемиот број на гласачко тело и во голем дел се директни конкуренти со албанските партии за некаков вид можна соработка. Но, таков договор или соработка досега немаме реализирано со ниту една политичка партија“, порачуваат од ПЕИ.

Во партијата на Цановски тврдат дека моментно се фокусирани на обезбедување демократски услови за функционирање на државата, како и организирање предвремени парламентарни избори заедно со локалните.

Портпаролот на ДУИ, Бујар Османи, вчера потврди дека работни групи на двете партии разговараат и дека има добра волја да се постигне договор.

„Има разговори, има добра волја кај двете страни, но преговорите не се завршени. Неточни се тврдењата дека има епилог, односно дека тие разговори се завршени“, изјави вчера Османи.

Од ДУИ најавија дека се иницирани преговори и со други помали политички партии, но не соопштија дали тие се дел од опозицискиот фронт предводен од СДСМ.

Генералниот секретар на СДСМ, Андреј Петров, вчера не сакаше да ги коментира информациите дека ПЕИ преговара со ДУИ.

Ова е втор пат Цаноски да ја доведе во прашање соработката со Црвенковски. Пред неколку месеци кога СДСМ го промовира својот кандидат за Маврово Ростуше, во ПЕИ беа незадоволни, бидејќи очекуваа таму да биде нивен кандидат, со оглед на големиот број македонски муслимани што живеат во оваа општина. Од ПЕИ тогаш ја смирија топката, најавувајќи дека ќе се согласат наместо оваа општина, да го добијат Долнени.