„Маршот на Дрина“ во ОН ги навреди Бошњаците

Друштвото на иселеници од БиХ во САД тврди дека тоа е озлогласена и насилничка српска националистичка песна

ОН изрази жалење доколку некој е навреден од изведувањето на „Маршот на Дрина“ на концертот во Генералното собрание. Мартин Несирски, портпаролот на генералниот секретар на ОН, Бан Ки-мун, на прашањето на новинарите во врска со изведувањето на „Маршот на Дрина“ одговори: „Свесни сме дека некои луѓе се навредени од таа песна и жал ни е доколку тоа се случило поради изведување на песната која инаку не беше вклучена во официјалната програма. Генералниот секретар, очигледно, или не бил свесен за што е таа песна или за тоа како се' во минатото таа била користена“.

Друштвото на иселеници од БиХ во САД како и Здружението на мајките од Сребреница во протестното писмо до Бан Ки-мун наведоа дека „концертот бил скандалозно понижување на жртвите од геноцидот во БиХ, бидејќи оркестарот ја свирел озлогласената и насилничка српска националистичка песна ’Маршот на Дрина‘“.

Од кабинетот на претседателот на Генералното собрание на ОН, Вук Јеремиќ, по тој повод излегоа со соопштение дека се жални обидите да се изврти значењето на песната „Маршот на Дрина“. „Со должно почитување кон сите жртви на трагичните војни во поранешна Југославија, ова е многу жален обид на извртување на значењето на музичкиот подарок кој му е понуден на светот оваа недела“, се наведува во соопштението од кабинетот на Јеремиќ и се истакнува дека тоа е длабоко навредливо за српскиот народ. „Србија за време на Првата светска војна загуби третина од машката популација во битките во кои се бореше на страна на сојузниците, а „Маршот на Дрина“ е песна која зазема централно место во сеќавањето на одбраната на слободата од агресорот“, се истакнува во соопштението.

Да потсетиме, претседавачот со Генералното собрание на ОН, Вук Јеремиќ, ја организираше прославата на Нова година по јулијанскиот календар и претставувањето на Србија во големата сала на Генералното собрание, на која присуствуваше и Бан Ки-мун кој со аплауз го проследи целиот концерт. (Бета)