Црвенковски: „Народот го разгоре огнот на слободата“

Што добро му се случи на Штип во изминатите четири години откако локалната власт ја има ВМРО–ДПМНЕ, праша опозицијата на протестниот марш

Иван Бојаџиски

Штип – Протестниот марш на опозицијата синоќа во Штип собра неколку илјади партиски членови, но и граѓани незадоволни од политиката која ја води актуелната власт. Поворката предводена од лидерот на СДСМ, Бранко Црвенковски, кандидатот за градоначалник на Штип, Здравко Коцев, лидерот на Достоинство, Стојанче Ангелов и пратеничките Маринела Тушева и Билјана Казанџиска, тргна од населбата Автокоманда за да запре на крстосницата кај зградата на Стопанска банка, каде се одржа централниот митинг.

Прв на насобраните граѓани им се обрати Здравко Коцев, кој рече дека актуелната државна и локална власт водат политика на целосна деградација на Штип.

„По што штипјани ќе го паметат Зоранчо Алексов? Што добро се случи во изминатите четири години откако локалната власт ја има ВМРО–ДПМНЕ? Дали изградија некој индустриски капацитет, улица, водовод, канализација? Ништо. Градот ’тоне‘, реката Отиња не личи на ништо. Наместо да градат, тие рушат. Ќе го рушеле Градскиот стадион, игралиштето за мал фудбал, ќе граделе згради... Во овие четири години штипјани се изложени на големи тортури, но ние на власта и' порачуваме дека не се плашиме, дека се' поголем број граѓани се приклучуваат кон протестниот марш на опозицијата“, рече Коцев.

За Стојанче Ангелов, ВМРО–ДПМНЕ и Никола Груевски се узурпатори на партијата, па праша дали тој, Љупчо Георгиевски и Љубе Бошковски не се ВМРО?

„И ние некогаш бевме во таа партија, но овие ја узурпираа. Груевски никогаш не беше тука кога се случуваа драматични работи за државата. Кога се носеше Законот за амнестија на хашките затвореници тој не кажа ништо, кога Скопје беше преплавено од албански знамиња, избега илјадници километри од дома. Груевски е политички плачко кој на неговите медиуми постојано плаче дека сите му се виновни, а најмногу Бранко. Затоа, кога требаше да избирам помеѓу политичкиот узурпатор Никола Груевски и политичкиот воин Бранко Црвенковски, јас го избрав Бранко, зашто тој е на вистинската страна на Македонија“, рече Ангелов.

Откако и пред штипјани говореше за „црниот понеделник“ опозицискиот лидер Црвенковски нагласи дека протестите се борба за правда и човечност.

„Огромна река од народ го разгоре огнот на слободата, на отпорот против диктатурата на оваа власт. Народот се крена и тргна по своето, си ја бара слободата, демократијата, правдата. Народот си ја бара Македонија назад, зашто Македонија нему му припаѓа. Нема запирање се' додека оваа ненародна власт не биде срушена“, рече Црвенковски, потенцирајќи дека народот седум години трпи закани и притисоци додека Никола Груевски и фамилијата си ги полнат џебовите, ги трошат народните пари и си ги лечат фрустрациите.

„Но, треба да знаат дека македонскиот народ низ целата историја можел многу да истрпи, ама кога еднаш ќе му зоврие, ќе тргне и ќе сруши се' што му стои на патот до конечната цел“, рече Црвенковски.