16.01.2013, 15:14 Херта Милер ја доби Светската награда за хуманизам
Писателката нобеловка Херта Милер е годинашната добитничка на Светската награда за хуманизам, која по седми пат ќе ја додели Охридската академија на хуманизмот. Нејзиното прогласување за лауреат на наградата е закажано за 18 јануари со пригодна свеченост во куќата „Уранија“. Беседа за творештвото на Милер ќе одржи Јордан Плевнеш, а ќе биде промовирано ексклузивно издание на нејзината книга „Животни во срцето“, во издание на „Феникс“.
Херта Милер е родена во 1953 година во Ницкидорф, мало место во Романија, во кое се зборува на германски јазик. Студирала германистика и романска книжевност. Како студент, Милер му се спротивставила на режимот на Николае Чаушеску и се придружила на група дисидентски писатели, кои се залагале за слобода на говорот. Емигрирала во Германија во 1987 годи��а по години поминати во прогони и цензура во Романија. Нејзино прво дело е збирката раскази „Надири“ кои ги напишала во 1982 година додека работела како преведувач во една фабрика. Расказите биле цензурирани од романските власти и Милер била отпуштена од фабриката откако одбила да работи за тајната полиција Секуритате. Нецензурираниот ракопис на нејзиното дело „Низина“ бил прошверцуван и објавен во Германија и веднаш добил добри критики. Херта Милер е авторка и на книгите „Земјата на зелените сливи“, „Состанок“, „Тиранско танго“, „Пасошот“. Наскоро на македонски ќе излезе од печат и нејзиниот роман „Нишалка на здивот“.
Нобеловата награда за литература Милер ја доби на 20-годишнината од падот на комунизмот во Европа. Објавувајќи ја веста за наградата, Шведската академија ја опиша како авторка која „со згуснатост на поезијата и искреност на прозата го слика пејзажот на обесправените“. Досегашни добитници на наградата на Охридската академија на хуманизмот, која установена во 2007 година им се доделува на врвни личности од светската уметност се јапонскиот будистички филозоф Даисаку Икеда, португалскиот синеаст Мануел де Оливеира, рускиот писател и нобеловец Александар Солженицин, индискиот композитор, хуманист и филозоф Рави Шанкар, театарскиот режисер и теоретичар Питер Брук, српската писателка Вида Огњеновиќ.
|
