Шест патишта го делат МВР од убијците

Реконструкција на „Утрински весник“ за можните патишта по кои побегнале сторителите на петкратното убиство

Горан Адамовски


Кон селата Синѓелиќ или Смилковци, на автопатот кон Куманово или Тетово, кон населбата Бутел или нагоре кон Љуботенски Пат. Шест патишта водат од Смилковското езеро кај Радишани каде што пред една недела се случи грозоморното убиство на петмина скопјани. По кој пат побегнале бруталните убијци?

Експертите укажуваат дека во вакви случаи, се одбираат патишта на кои нема голема фреквенција од возила и од луѓе. Обично се одбираат друмски улици. Да се следи трагата на убијците е пат со низа препреки, бидејќи се претпоставува дека тие користат неколку возила, особено ако станува збор за професионалци.

Убиствата што ја зацрнија земјава се случија изминатиот четврток. Според жителите на Смилковци, истрелите се слушнале околу 19,15 часот, кратко пред да се стемни. Петте тела беа пронајдени околу 22,30 часот. Во тие три часа разлика, сторителите на велигденскиот масакр комотно можеле да ја свртат половина Македонија, па и да ја напуштат земјава.

„Утрински весник“ вчера го прочешла теренот околу Смилковското езеро, оддалечено десетина километри од центарот на Скопје. Тоа е едно од неколкуте т.н. Железарски езера, сместени зад Железарницата. Просторот е видлив со голо око, нема дрвја, ниту објекти. Вчера немаше ниту полиција, па слободно можевме да дојдеме до таму. Лентите за увид и натаму стојат кај надвозникот до езерото. Убиствата биле извршени на земјен пат, односно педесетина метри од надвозникот. Единствениот асфалт е токму кај мостот. Зад езерото има земјен пат и еден куп ниви, на кои и вчера работеа луѓе. Врнежливите денови го направија патот непрооден за автомобил. Сега таму може да се мине само со трактор. Патот е долг три километри. Минатата недела беше суво, се минуваше и со автомобил. На крајот од нивите, се влегува во селото Синѓелиќ. Оттаму може да се оди во Стајковци, Арачиново или во градската населба Ченто.

Се качите ли на мостот, единствениот пат води кон селото Смилковци, оддалечено стотина метри. Солидниот селски пат води кон блиското Црешово, од каде што беше еден од убиените. Потоа нагоре кон Булачани, Раштак, Виниче и Бреза. Се движите десетина километри во подножјето на Скопска Црна Гора, а зад неа е Косово. Станува збор за прилично населени места, патот е тесен, но асфалтиран, постојано наидувате на луѓе или возила. Не одите ли нагоре, од Црешово можете да продолжите кон селото Страчинци, до кое има околу два километри. По 4-5 километри, наидува Арачиново и стариот пат кон Куманово. Покрај селата крај патот, не изгледаат далеку ниту илегалните патишта кон Косово или Србија.

Ако од Смилковското езеро не се качите на надвозникот, тогаш морате да заминете по локалниот пат лево, долг 2,5 километри, кој ќе ве одведе до населбата Бутел. Лево оттаму се влегува во населбата. Само на почетокот има неколку куќи, потоа е празно, патот е час со дупки, час со асфалт. По три километри, се стигнува во градот, речиси на булеварот „Босна и Херцеговина“.

На спротивната страна од Бутел, е патот за Радишани. По стотина метри, се влегува во населено место. Куќи и ниви. Но, на помалку од километар, тесниот и асфалтиран пат се раздвојува: може да се влезе во селото Радишани, од каде што беа тројца од четирите убиени момчиња, или да се продолжи нагоре кон селото Љуботен, оддалечено шест километри. Патот е солиден, возила нема, нема ниту куќи, ретко луѓе, особено навечер. И од таму може да се стигне кон Скопска Црна Гора.

Ако, пак, не одите ниту во Бутел ниту во Радишани, морате да се приклучите на обиколницата. Од левата страна, веднаш се наидува на патоказ за Тетово (51 км) и за Приштина (89 км). По тој пат може да се исклучите на неколку клучки: кај Топанско Поле, дури и понатаму кај Визбегово (околу 8 км), од каде што границата со Косово е оддалечена 12 километри.

Од десната страна, автопатот кон води кон Куманово (42 км) и Велес (64 км). Сепак, по четири километри возење, од десната страна може да се исклучите: лево преку мостот во Црешево или веднаш да се спуштите во Стајковци. Од Стајковци, Арачиново преку Брњарци е оддалечено седум километри. Се вози по тесен селски пат, куќи во растојание од околу еден километар, додека се излезе од селото. Од другата страна на Стајковци, практично споено со Стајковци е селото Синѓелиќ, од каде што, како што рековме, може да се стигне и по земјениот пат кај нивите на Смилковско езеро.

Кој пат и да го фатиле убијците, тие, барем засега, се недостижни за истрагата. Два дена по убиствата, полицијата соопшти дека има индикации оти автомобил „опел омега“ со црвена боја и со лажни скопски таблички, кој беше пронајден на десетина километри од Смилковското езеро, бил таму и во моментите на злосторството. Дали убијците се возеле во тој автомобил, дали биле само во едно возило, каде побегнале потоа - се дел од прашањата на кои истрагата се' уште бара одговор.