Oпштините останаа без женска рака

Ниту една од 13-те кандидатки за градоначалник не победи на локалните избори во кои учествуваа 364 мажи

Жаклина Хаџи-Зафирова

Ташули Јуца ги урна сите надежи на жените кои до последен момент беа убедени дека ќе добијат барем еден кандидат за градоначалник на Крушево кој влегува во вториот круг. Името на Ташули Јуца вчера внесе забуни и во СОЖМ, кои се изненадија од фактот дека станува збор за маж, а не за жена, иако претходно во нивните аналитики го вбројуваа меѓу жените.

Ниту една од жените-кандидати за градоначалник не успеаја да влезат во вториот круг на овие избори, за кои се кандидираа дури 364 мажи, а само тринаесет жени. Се прават конечните анализи за тоа колку жени се влезени на советничките листи, но и за нив во Сојузот на организации на жени на Македонија не се оптимисти.

„Имавме неполни пет проценти кандидати за жени- градоначалници, а ваму говориме за еднаквост и унапредување на еднаквоста и за закони каде што квотите постојат, но нема кој да ги почитува“, вели претседателката на СОЖМ, Савка Тодорова. Таа најави дека ќе побараат одговорност од државните органи, кои се занимаваат со полова рамноправност, а ќе поведат постапка и за Државната изборна комисија каде што од седумте членови само една е жена, што е противзаконски, тврдат од СОЖМ.

Во анализите за овие избори ќе влезе и податокот дека единствената жена-кандидат за претседател, Мируше Хоџа, ги изгуби изборите, а истото и' се случи и на кандидатката за градоначалник на Скопје, Мирјана Најчевска. Градоначалничките фотелји не ги добија и дванаесет други кандидатки, меѓу кои Силвана Бонева во Струмица, Дијана Ѓоргиевска во Битола, Мила Искреновиќ во Карпош и Јорданка Николовска во Центар. Најмногу кандидатки на овие избори, дури пет, имаше Партијата на обединети демократи на Македонија - ПОДЕМ, но ниту една од нив не влезе ни во вториот круг.

„Жена-градоначалник за нас е како да добиеме на лотарија. Од 364 кандидати, само тринаесет се жени, што значи имавме неполни пет проценти“, вели Тодорова. Со став околу застапеноста на жените на советничките листи, СОЖМ ќе излезе откако ќе ги направат сите анализи. Претходно, тие ги анализирале листите кои партиите ги поднеле до ДИК, каде што утврдиле дека жени-носители на листи немало ниту 10 проценти, поточно од 1.700 кандидатки за носители, само 81 жена била на првата позиција. На второ место биле повеќе од 200, а на трето близу 400. Но, ваквите бројки за СОЖМ не се задоволувачки.

„Се покажува дека квотата е нужно потребна. Се' уште има предрасуди и стереотипи за местото и улогата на жената во општеството и партиите. Жените не се охрабрени и не се прифатени добро во партиите каде што не се наметнуваат. Нив ги храбрат единствено невладините организации“, појаснува Тодорова. Таа е посебно разочарана во Комисијата за еднакви можности и во Женското парламентарно лоби, кои би требало да се борат за повеќе права за жените, но не го прават тоа.

Тодорова потенцира дека на минатите избори имало три жени- градоначалнички во Крушево, Осломеј и Центар, кои ја извршувале таа функција во два мандата, што оцени дека било вистинско освежување во регионот.