Најмногу од неопределените за Бошкоски

Најголем процент од гласовите на неопределените избирачи, односно на избирачите кои од разни причини не сакаа да кажат за кого ќе гласаат, на претседателските избори отидоа кај Љубе Бошкоски, покажуваат анализите на агенцијата „Рејтинг“. Повеќето агенции предвидуваа дека Бошкоски ќе освои само 8 отсто од гласовите, но крајниот скор е дури 15 отсто од вкупниот број гласачи, што претставува 90 отсто повеќе од изјаснетите за него во испитувањата. Најголем скок на рејтингот, според резултатите на денот на изборите, во однос на претходните анкети, зад Бошкоски, има Љубомир Фрчкоски, за кого агенциите предвидуваа дека во првиот круг ќе освои од 10 до 14 отсто од гласовите, наспроти 20 отсто колку што освои во првиот круг, што покажува дека дури 40 отсто од неговото гласачко тело се наоѓало во зоната на стравот од изјаснување, објаснуваат од „Рејтинг“. Такви проблеми немале другите кандидати кои добиле значително помал процент на гласови од процентот на неопределените, кој по првата половина од кампањата изнесуваше 24 отсто.

Независно од ова, „Рејтинг“ ги прогнозираше со голема точност резултатите од овие избори во првиот изборен круг, се пофалија од агенцијата. (Д.Р.)