Милошоски се' уште чека одговор од Грција

„Македонија се' уште нема добиено одговор од Грција на иницијативите дадени од македонска страна, меѓу кои и за создавање заедничка образовно-историска комисија“, информираше вчера во Талин, Естонија, македонскиот шеф на дипломатијата, Антонио Милошоски. Сепак, тој очекува „во блиска иднина да добиеме сериозен одговор на оваа сериозна иницијатива“. „Сметаме дека таквите иницијативи ќе придонесат за заемно разбирање и за избегнување некои непотребни недоразбирања во иднина“, рече Милошоски, според кого ваквите иницијативи се покажаа како корисни во Германија и во Франција, Полска и Литванија и во некои други земји. Пред неколку дена, како што рече тој, во консултации со МВР и по некои настани кои се случија во Грција и во Македонија, поврзани со помали инциденти со наши и грчки граѓани испратен е предлог до грчкото МНР за да го проследи до грчкото МВР, за создавање заеднички совет меѓу грчкото и македонското МВР, со цел во иднина да се спречат сите вакви случаи со помош на посилна заемна соработка.

Милошоски вчера од Естонија и' го честиташе Денот на независноста на Грција. „Би сакал во името на македонскиот народ да им го честитам националниот празник Ден на независност на граѓаните на Грција и би сакал да кажам дека многу го почитуваме нивниот национален дигнитет и независност и не бараме ништо повеќе освен исто почитување на националниот дигнитет и независност на нашата земја“, изјави Милошоски. (Н.Р.)