Телевизија Сител најнеизбалансирана во изборната кампања

Телевизиите Алфа, Наша ТВ од Скопје и Канал 8 од Кочани го прекршиле изборниот молк

„Со мали исклучоци, медиумите со своето известување за текот на изборната кампања и за изборниот ден придонесоа за создавање позитивна слика пред домашната и меѓународната јавност за одвивањето на изборите во демократска атмосфера“. Ова е генералната оцена на Советот за радиодифузија, која ја изнесе претседателот Зоран Стефановски, пренесувајќи ги резултатите од мониторингот на медиумите за избалансираноста во покривањето на кампањата за претседателските и локалните избори. Тој информира дека Советот повел пет прекршочни постапки за разни прекршувања на законот и уште три за нарушување на изборниот молк.

„Против телевизија Сител се поведени две постапки, и тоа поради неизбалансирано покривање, како и поради објавување резултати од испитување на јавното мислење по законски дозволениот рок. За Наша ТВ е поведена постапка поради непочитување на правилата за емитување платено политичко рекламирање, за телевизија Здравкин поради користење посебни информативни емисии како облик на платено политичко рекламирање и за МТВ 2 поради учество на уредник на телевизијата во изборна кампања на една партија. Прекршочни постапки се поведени и за нарушување на изборниот молк, и тоа за Алфа ТВ и Наша ТВ од Скопје и против Канал 8 од Кочани“, рече Стефановски.

Според него, во известувањата од изборната кампања драстична неизбалансираност е констатирана кај Сител, и тоа во текот на целата изборна кампања, додека релативно неизбалансирано известувале телевизиите МТВ 1, Телма, Алфа, Канал 5 плус и Сител 3, потоа Првата програма на Македонското радио и радиопрограмите на албански и турски јазик.

Стефановски се пожали дека додека бил вршен мониторингот, биле изложени на притисоци од одредени медиуми, но како што истакна, тие не потклекнале на нив и тоа не се одразило на нивното работење и во носењето одлуки.

„Во овие 70-ина дена Советот беше изложен на многу притисоци од различни субјекти. Ги разбираме нервозните реакции на некои медиуми, кои веројатно се резултат на санкциите што беа преземени против нив“, истакна Стефановски.

Тој забележа и дека пишувањата против него во еден од дневните весници се невкусни лаги и инсинуации и дека по завршувањето на изборите ќе поднесе и кривична пријава. (Св.У.)