Ако плаќаат за рецепти, нема да одат на лекар

Против воведување партиципација кај матичните лекари се и пензионерите, бидејќи нова��а давачка ќе им го поскапи лекувањето

Јасмина Јовановска


Ако прегледот кај матичните лекари се наплаќа 50 денари, нема да се оди на лекар и покрај болеста, се најчестите коментари на пациентите. Новата партиципација само ќе им го поскапи лекувањето на болните, кои и сега се жалат дека многу плаќаат за секакви здравствени услуги и за лекови, а не, пак, да им се воведе нова давачка.

На удар на новиот надомест кај матичен лекар особено ќе бидат пензионерите и хронично болните, кои ќе мора да платат 50 денари и за подигање рецепти. „Ќе штедат и нема да одат на лекар, па ќе умираат без лекови“, е реакцијата од Сојузот на пензионерите на иницијативата на матичните лекари да се воведе партиципација во примарните амбуланти, бидејќи со сегашните приходи ординациите не можеле да опстанат.

Ако се знае дека секој трет жител живее во сиромаштија, новата партиципација ќе им го истенчи и така тенкиот џеб на пациентите. Заедно со она што го даваат за лекови и за други испитувања, од свој џеб пациентот ќе мора да издвои најмалку и до 500 денари месечно.

„Живееме со 13.000 денари, за што попрво да ги дадеме парите, дали за храна, за режиски трошоци или за лекови. Каде е тоа бесплатно здравство за сите, ако сега мораме да даваме пари и кај матичниот лекар“, реагира една 52-годишна жена, која има две деца, а сопругот не работи.

Речиси сите пациенти слично реагираат и прашуваат зошто да плаќаат кај матичниот лекар кога државата декларира бесплатно примарно здравство достапно за сите. „Ако им се малку парите на лекарите, нека ги бараат на друго место, а не преку грбот на пациентите“, вели една пациентка.

Но, има и такви што велат дека не им е пречка да дадат 50 денари. „Немам многу, но матичната лекарка е толку хумана и пожртвувана. Не се многу 50 денари, бидејќи таа не' советува и ни се наоѓа и надвор од работното време, а понекогаш рецептите ни ги носи дома“, вели М.Т..

Против воведување партиципација кај матичните лекари најмногу се пензионерите. „Ние бараме да не' ослободат од другите партиципации, а не да не' товарат со нова. Дали лекарите знаат дека над 20.000 пензионери во државата живеат со 5.200 денари. Како тој пензионер ќе може да даде 50 денари за да ги подигне рецептите, кога не му останува ни за леб“, реагира претседателот на Сојузот на пензионерите, Душко Шурбановски.

„Ако се знае дека пензионерите одат на лекар во просек и по три пати во месецот, тогаш сигурно е многу да плаќаат по 50 денари при секое влегување во ординација“, реагира и претседателот на Комисијата за здравство при Сојузот на пензионерите, Илија Глигоров. Тој вели дека хроничните болни не одат на лекар од ќеф, туку кога имаат проблем. „Оваа мерка не е хумана, ни солидарна. Со партиципација пензионерите ќе штедат и ќе умираат без лекови“, додава Глигоров, според кој матичните лекари не се многу за жалење, зашто нивните плати сигурно се неколку пати над просечната плата во државата.

И стручњакот за јавно здравство, Владимир Лазаревиќ, вели дека матичните лекари не треба да бараат повеќе пари преку грбот на пациентите. Тој смета дека иницијативата е само притисок врз здравствените власти за да се промени плаќањето на примарното здравство.

„Лекарите имаат право да бараат да се воведе партиципација. Прашање е дали таа ќе им се одобри, посебно што се руши концептот на реформата за примарното здравство да биде бесплатно и достапно за сите пациенти“, вели Лазаревиќ. За него партиципацијата од 50 денари е превисока. „Во услови на сиромаштија, ретко кој може да издвои 50 денари, што е премногу за нашиот стандард и сигурно лошо ќе се одрази на пациентите, па ќе се мислат дали да појдат на лекар“, додава Лазаревиќ.

Но, според него, веќе ништо нема за џабе. „Треба да се измери колку работат лекарите од примарното здравство и колку заработуваат. Да се направат стручни анализи кои сега ги нема. Врз база на нив ќе може парите кои ги има во здравството да се прераспределат според тоа кој колку работи. Ако 30 отсто од работата ја вршат лекарите од примарното здравство, тогаш 30 отсто од парите да одат кај матичните лекари“, објаснува Лазаревиќ.

Матичните лекари, пак, бараат воведување партиципација за преглед, бидејќи се во тешка финансиска состојба, пред се' поради нередовната исплата на парите за капитација, но и поради тоа што не ја земаат 100 отсто платата, туку постојано им се крати поради одредени казни. Од Фондот за здравствено осигурување велат дека сега завршуваат со исплата на парите за превентивните цели за последниот квартал. А, од п��неделник ќе почнат да исплаќаат и капитација за октомври, што е според договор со 60 дена одложено плаќање. Според неофицијални извори, од фондовската каса им се исплаќаат парите за капитација на матичните лекари тогаш кога ќе им пристигнат парите од Министерството за финансии.

Кумановските лекари ги прекинаа дежурствата

Револтот од ниските приходи матичните лекари почнаа да го изразуваат и во практика. Матични лекари во Куманово ги прекина дежурствата кои досега ги спроведуваа во Службата за итна медицинска помош.

Од Здружението на матични лекари „Медикус“ информираат дека се одлучиле на ваков чекор бидејќи се единствените во државава што дежураат иако, според законот, сите градови што имаат организирано итна помош се должни да си организираат вакви дежурства.

Матичните лекари решиле да повлечат ваков потег зашто не се надлежни за организирање дежурства. Во Куманово функционира Итна помош и, според законот, велат лекарите, предвидени се ноќни смени. (Ј.Ј.)