Насловна

Охрид

Иванов: Иднината го обединува регионот

12.07.2011, 15:53

Евидентен е позитивниот тренд и позитивните процеси во регионот, со кој се менува перцепцијата создадена за него. Балканот не е она што беше, во сите сфери во регионот се евидентни позитивни тенденции, обединети со забрзаните процеси на евроатлантските интеграции, истакна претседателот Ѓорѓе Иванов на заедничката прес-конференција со неговите колеги од Албанија, Црна Гора и Косово, Бамир Топи, Филип Вујановиќ и Атифета Јахјага во Охрид.

- Наши заеднички цели кои беа искажани на денешниот самит се пред се јакнењето на економската соработка, поддршката на слободниот проток на луѓе и капитал, промовирањето на претприемништвото, поттикнување на регионалните инвестиции, поврзувањето на стопанските комори и заедничките проекти за привлекување инвестиции. Тоа е единствен начин за обезбедување економска благосостојба за граѓаните, но истовремено и влог за иднината, рече Иванов. Тој истакна дека со неговите колеги на третиот по ред Регионален самит разговарале за повеќе клучни теми кои треба да го олеснат патот кон ЕУ и ��АТО, да го забрзаат севкупниот развој на општествата одделно, но и да придонесат за стабилноста, безбедноста и просперитетот на регионот во целина.

Претседателот Иванов со оценка дека средбите како оваа во Охрид овозможуваат негување и унапредување на дијалогот меѓу земјите на највисоко ниво и оттаму нивното значење за заедничките приоритети на државите, пред се забрзаната интеграција на регионот во ЕУ и НАТО.

- Регионот во целина има постигнато голем успех и тоа го констатиравме во конструктивен и содржаен дијалог што го имавме денеска. Пред една деценија овде во Охрид го имавме склучувањето на Охридскиот рамковен договор кој навистина придонесе за разбирање и јакнење на соживотот во нашето мултиетничко општество и истовремено надградување на нашата вековна традиција, преку почитување за она што е различно. Тоа е позитивен пример каква завршница треба да имаат таквите настани, порача Иванов.