Собарката лажела за Доминик Строс-Кан
Наводно, нападнатата, по потекло од Гвинеја, повеќепати лажела откако се случи наводниот напад на 14 мај
Случајот на поранешниот шеф на ММФ, Доминик Строс-Кан за сексуален напад се чини дека наидува на проблеми поради загриженост за кредибилитетот на наводната жртва. Претставници за спроведување на законот изјавија за американските медиуми дека тужителката повеќепати лажела откако се случи наводниот напад на 14 мај. Собарката, по потекло од Гвинеја, се чини дека лажела во својата апликација за азил, јавија официјални извори.
Строс-Кан требаше да се појави на суд вчера. Се очекуваше неговите адвокати да бараат олеснување на условите за кауција. Францускиот политичар (62) е во домашен притвор во апартман во Њујорк, откако в�� мај даде гаранција од шест милиони долари во готовина и обврзници. Тој има вооружена стража, електронски надзор и носи електронски монитор на зглобот. Строс-Кан е обвинет по седум точки, меѓу кои четири обвиненија за кривично дело - две за криминални сексуални дејства, едно за обид за силување и едно за сексуален напад - плус три прекршоци меѓу кои незаконско притворање.
Строс-Кан, кој поднесе оставка на функцијата шеф на ММФ за да се брани, енергично ги отфрла обвиненијата. На претходните судски сослушувања, обвинителите зборуваа за силата на случајот. Еден адвокат рече дека доказите против него се „суштински“. Меѓутоа, американските медиуми сега јавуваат дека обвинителите планираа на вчерашното судско рочиште да ја изнесат својата загриженост во врска со кредибилитетот на 32-годишната собарка пред судијата. Иако форензичките испитувања дадоа недвосмислени докази за сексуален однос меѓу Строс-Кан и жената, обвинителите сега не веруваат во она што го кажа тужителката за околностите или за неа лично, јавува „Њујорк тајмс“. Тие веруваат дека има недоследности во тврдењата за нејзината апликација за азил, пишува весникот.
Собарката, мигрант од западната африканска држава Гвинеја, изјави пред властите дека Строс-Кан и' пришол откако влегла во неговата соба во хотелот „Софител“ во Њујорк за да ја исчисти. Тимот на одбраната се очекува да тврди дека имало сексуален однос, но оти се случил со согласност.
Строс-Кан се сметаше за водечки кандидат за иден претседател на Франција од централната левица се' додека не се појавија обвиненијата. (Би-Би-Си) |
