Конгрес на СДСМ
Црвенковски доби поддршка од делегатите
03.07.2011, 18:28
Со 562 гласа „за“ и 6 „против“, Бранко Црвенковски повторно е избран за лидер на Социјалдемократскиот сојуз на Македонија на денешниот 13-ти Конгрес на партијата што се одржа во Битола.
На тајното гласање, за членовите на Централниот одбор 536 гласале „за“, а 27 делегати „против“. За членовите на Надзорниот одбор на СДСМ, 534 делегати на Конгресот гласале „за“ и 30 „против“.
На Конгресот, СДСМ го усвои и Извештајот за постигнатите резултати на предвремените парламентарни избори и изгласа доверба на органите и телата.
„Од вкупно 709, на Конгресот учествуваа 579 делагати. Конгресот на СДСМ едногласно го усвои извештајот за парламентарните избори 2011 година. За извештајот дискутираа 20 делегати, во дел од дискусиите имаше и критички осврт и со тоа покажавме дека дебатата се води внатре во органите на партијата и тоа за СДСМ е голема придобивка“, рече генералниот скретар на СДСМ, Андреј Петров.
На Конгресот на СДСМ му претходеше седница на Централниот одбор.
|
