Интервју
Денч: Никој не може да пишува како Шекспир
Од нашиот известувач
Сунчица Уневска
Карлови Вари - „Никогаш не бев убава и затоа мислам дека се работи за талентот, дека можам да ја одиграм улогата добро", со смеење изјави Џуди Денч, која и на 77 години изгледа одлично. "Мислам дека имам многу среќа. Зад мене стојат во ред сигурно илјадници кои би ја сакала истата улога, но ја добивам јас. Мислам дека се работи за голема среќа", вели оваа неверојатна актерка, која само следната година очекува шест нови премиери.
Кај Џуди Денч изненадува распонот на улоги што таа ги добива и во сите е подеднакво уверлива. Кај Шекспир играше многу, ја играше кралицата Викторија, па кралицата Елизабета I, потоа ја играше слободоумната Арман во „Чоколадо", писателката „Ајрис" која има Алцхајмерова болест, па се до студената и енергична М, шефицата на Џемс Бонд.
„Шекспир! Ако имате време за него можам да зборувам до вечер. Но, ако му се вратам на театарот ќе загуби филмската индустрија (се шегуваше Денч, нагласувајќи дека британскиот и американскиот хумор се многу различни). Никој како Шекспир не може да пишува за љубовта, за алчноста, за љубомората, за зависта. Се вљубив во Шекспир од многу мала. Бев цело време во театрите и ги гледав сите претстави. Всушност, мојот брат сакаше да биде актер, а јас сакав да бидам театарски дизајнер. Но, сега мислам дека не би можела да работам ништо друго“, вели Денч.
(Целосното интервју со Џуди Денч ќе можете да го прочитате во утрешното печатено издание на „Утрински весник“)
|
