Промовиран унифицираниот изглед на скопските такси возила
03.07.2011, 13:35
Градоначалникот на Град Скопје Коце Трајановски и министерката за внатрешни работи Гордана Јанкулоска денеска официјално ги промовираа унифицираните ознаки за авто-такси превозниците во главниот град и ги доделија лиценците за авто такси дејност.
Такси–превозниците со ова ќе добијат унифициран изглед во надворешното обележување на возилата и внатрешниот изглед на возилото.
Секое возило добива унифицирана табла со натпис ТАКСИ и број од изводот од лиценцата, издадена од Град Скопје. Такси возилата ќе бидат видно обележени и со надолжни налепници, изработени од ретрорефлектирачка фолија (лесно забележлива и во темнина), заштитена од фалсификување со хо��ограм.
Во внатрешниот дел на секое возило унифицирано се поставуваат информации за извод од лиценцата на авто-такси возилото, легитимација на возачот и тарифа за наплата. Овие изводи со унифицирани димензии се поставуваат на пропишани јасно воочливи места за патниците на предниот кокпит на возилото.
„Со промоцијата на унифицираните ознаки за авто-такси превозниците стартува реализацијата на новиот концепт и организација на овој вид превоз на патници, утврден со Одлуката за авто такси дејност на подрачјето на град Скопје, донесена во октомври 2010 година, ќе стави крај на хаосот во такси превозот“, изјави градоначалникот Трајановски.
Град Скопје за изработка на ознаките за унифицирање (табли и налепници) за сите возила предвидени со Одлуката издвои 5.800.000 денари, од кои 3,8 милиони денари за таблите и 2 милиони денари за налепниците, а истите бесплатно се поделени на лиценцираните авто такси превозници.
Во овој дел околу организацијата на такси превозот, Град Скопје, согласно Одлуката, досега уреди 90 такси стојалишта и до крајот на септември ќе бидат уредени уште 45, со што ќе се обезбедат услови на нив да се стационираат околу 720 авто-такси возила.
|
