Писмо на основачи на ВМРО-ДПМНЕ

Бранко и Љупчо се стари пријатели

Основачите на ВМРО-ДПМНЕ Борис Змејковски, Владо Таранталовски, Мане Јаковлевски, Васил Наумов и Дијана Таранталовска со отворено писмо му порачаа на Љупчо Георгиевски дека неговото здружување со Бранко Црвенковски е настан кој „овозможува прочистување, разјаснување на многу недоумици кои народот и тие како основачи, ги имале низ годините“.

„Како луѓе кои целиот живот го посветија на идеите за ВМРО и Македонија, но и како чесни граѓани, како родители, како патриоти кои ја сакаат државата и кои не го носат товарот на дневната политика и со искрена желба да биде слушнат нашиот збор како основачи на ВМРО-ДПМНЕ, сакаме да истакнеме дека човекот самиот си го одбира пријателот. Тој е огледало на сопствените размисли, особини и светогледи. Двајца луѓе се пријатели затоа што си одговараат во карактерите, така е и со Љупчо и Бранко“, велат основачите на партијата.

Според нив, овие пријатели, едниот со товарот на транзицијата, приватизацијата, шверцот и криминалот, а другиот со погрешна перцепција за историјата и постоење на сопствениот народ и држава, со нивната љубов за власт и парите, се едно исто - пријатели во коалиција за власт и пари.

Спојувањето, како што додаваат, е неповторлива можност да се добие јасна слика за многу работи.

„Прво, со нивното здружување секој вмровец треба да се замисли зошто Љупчо ја рушеше владата на Никола Кљусев? Зошто Љупчо Георгиевски не формираше коалиција со албанска партија и со тоа не се формираше стабилна влада? Зошто Љупчо на тацна му го подари управувањето со државата на Бранко Црвенковски, иако народот не одлучи така на избори?

Второ, зошто во 1994 година Љупчо бојкотираше и не влезе во парламентот и ги остави СДСМ да ја реализираат мрачната приватизација, шверцот и разграбувањето ��а Македонија? Зошто Љупчо го бранеше криминалот на Бранко во деведесеттите? Трето, зошто 15 години ВМРО-ДПМНЕ беше марионета со која СДСМ мошне лесно се справуваше? Четврто, зошто Георгиевски прифати да биде потпретседател на претседателот Глигоров, прифаќајќи измислена функција наменета да ја канализира патриотската енергија која пулсираше во Македонија, истата онаа која според кажувањата на сите во тоа време му донесе изненадувачка висока поддршка на ВМРО-ДПМНЕ? Зошто дозволи патриотизмот да се изгнаси со криминалот на Бранко? Петто, зошто Љупчо толку лесно и без поголем личен отпор се согласи со Бранко за промената на знамето, името, Уставот?“

Најпосле прашуваат гласно основачите и додаваат: „Одговорот е дека сето ова се случуваше затоа што Бранко Црвенковски навистина соработувал во деведесеттите со Љупчо Георгиевски, затоа што тие се лицето и опачината на една иста паричка. Затоа што простите факти го кажуваа тоа. Како инаку ќе се образложат сите погубни потези на Љупчо во 90-тите“. (П.Р.)