Груевски: Бранко да каже кој е Черчил, а кој Сталин

Груевски вчера во Тетово ја предаде во употреба новоизградената спортска сала во дворот на училиштето „Ѓоце Стојчевски“

Тетово – „Бранко Црвенковски првин да каже кој меѓу нив е Черчил, а кој Сталин, па дури потоа ќе дадам коментар“. Вака одговори на новинарско прашање премиерот Никола Груевски за време на вчерашниот престој во Тетово, запрашан што мисли за коментарот на Црвенковски дека двајцата светски лидери се здружиле да го соборат Хитлер.

Груевски уште додаде дека се различни и многубројни реакциите за коалицијата на Георгиевски и Црвенковски. „Дури сега некогашните симпатизери на Георгиевски разбираат што се случувало во минатото. Сето ова оставам граѓаните сами да го оценат“.

Новинарите прашаа и за тврдењето на некои директни учесници за наводната вклученост на Црвенковски и Фрчкоски во криминал. „Јавна тајна е дека биле вклучени во трговијата со нафта и нафтени деривати. Директниот учесник во тие преговори и неговото искажување е јавно бламирање. Ова е запрепастувачки. Човекот само потврдува што се случило. Граѓаните нека го ценат тоа што било направено“, одговори Груевски.

На прашање што очекува од Кипар со преземањето на претседавањето со ЕУ, Груевски рече: „Кипар нема некое големо влијание. Сепак, ние очекуваме фер и коректна соработка и валоризација на она што сме го сработиле и конечно, наше членство во ЕУ и НАТО“.

Премиерот Никола Груевски вчера во Тетово ја предаде во употреба новоизградената спортска сала во дворот на училиштето „Ѓоце Стојчевски“, за која рече дека се потрошени 24 милиони денари и дека шеста по ред во тетовскиот крај, во кој во градба се уште две вакви сали, а ќе се градат уште девет. Во Државниот универзитет промовираше 15 преведени научни книги на македонски и албански јазик. Инаку, ова е прва средба на новопоставениот в.д. ректор Вулнет Амети со премиерот, по неотповикливата оставка на досегашниот Агрон Река, кому во менаџирањето со ДУТ инспекторите му нашле повеќе недостатоци. (Г.Е.)