Мое ќоше

Добриот Грујо и лошиот Бранко

Ерол Ризаов

Кои се нашите теми оваа изгор лето и кочан политика

Летото станува изгор, а политиката кочан. Човек може убаво да се забавува со приказните за лошиот и нечесниот Бранко Црвенковски и за добриот и чесен Никола Груевски, за преродбеничката и омилена ВМРО-ДПМНЕ и расипничкиот и омразен СДСМ. За градителите и уривачите, за патриотите и предавниците на Македонија, за лошите соседи со кои сме опколени од сите страни. Да, тоа може да биде хумористично и забавно четиво доколку не е тажно и трагично за иднината на повеќе генерации граѓани од кои мнозинството, според сите анкети, нема повеќе надеж и е потполно свесно дека упорно одиме како балкански камикази во погрешна насока.

Додека „мрзливите“ Црногорци ги почнуваат преговорите со Брисел за рамноправно членство во ЕУ и ќе бидат за три-четири години трета поранешна југословенска република во европското семејство, еве ги нашите главни летни теми: Изборната кампања за комунални, локални избори почна една година пред да се одржат. Премиерот Никола Груевски некни не' повика да си го сочуваме достоинството кога одиме во Грција и секој од нас да размисли дали да оди ако Грците се подготвени да ни залепат ФИРОМ и на челото, а не само на автомобилот. А клетите Грци (добро е, не се само Турците клети) тоа го правеле оти во 1995 година СДСМ ја потпишал Привремената спогодба со Грција. Овој своевиден повик за бојкот на Грција упатен се разбира и до мене ми го врати достоинството и ми послужи за добро оправдување пак летово да си заминам за Охрид во духовната престолнина на Македонија и световниот главен град на СДСМ.

Добриот Груевски во својот патриотски вознес и поход за враќање на достоинството на македонските граѓани испушти да каже неколку важни работи. Како тоа меѓудржавниот договор потпишан од тогашните министри за надворешни работи Карлос Папуљас и Стево Црвенковски, а посведочен во согласност со Резолуцијата на ОН 845 (1993) од Сајрус Венс, специјален претставник на Генералниот секретар на ОН, одеднаш стана Договор на СДСМ. Дали сите договори по истата аналогија денес што ги склучува Владата и ги потпишува лично премиерот или неговите министри се договори на ВМРО-ДПМНЕ или на државата Македонија. Во суштина поради обземеност од опозицијата Груевски им даде на социјалдемократите голем подарок препуштајќи ја Привремената спогодба исклучиво како нивно дело и достигнување. Според врвните светски експерти и правници за меѓународно право, Привремената спогодба меѓу Македонија и Грција потпишана 1995 година е најголемиот адут на Македонија потврден и со историската пресудата на меѓународниот суд во Хаг со што Груевски со право толку се гордее. Дали може некому да му биде јасно како еднаш истиот тој документ служи како кралски доказ во Хаг дека е прекршен од страна на Грција, а другпат за наши домашни потреби е срамен акт потпишан од предавничката СДСМ. И уште нешто многу поважно, ако веќе ги обвинуваме Грците за оние срамни налепници, подобро е да видиме дали и сега со тоа ја прекршуваат Привремената спогодба, отколку да им дадеме за тоа оправдување обвинувајќи ја опозицијата. Вака испаѓа дека Грците лепат налепници со право оти предавниците од СДСМ потпишале Договор кој им го дава тоа право.

Втората тема која ме засмеа да солзи е истражувачкото новинарство на најгледаните наши телевизии. Извесен босански ебиветер станува значајна фигура и клучен сведок за криминалот на Бранко Црвенковски и СДСМ при кршењето на ембаргото кон Србија. Големо откритие, нема што. Наместо да се потпираат на белосветски криминалци, овие наши журналисти можеа да поентираат ако побараа од своите газди автентично сведоштво од прва рака. Едниот од овие, познати коалициски партнери на власта, е вистински експерт за кршење на ембаргото кон Србија. Точно знае и кој и како го кршеше ембаргото, колку пари од тоа зема државата, колку компаниите, а колку пари отидоа во приватни џепови. Неговото сведоштво би била вистинско новинарско истражување.

Еве ова се нашите главни теми: ексклузивното сведоштво само за гледачите од Македонија на угледниот криминалец од Босна, потоа следуваат клетите Грци, кои само што не ни залепиле етикета со ФИРОМ на челото, промената на имињата на улиците, 30 метри споменик на Мајка Тереза. Еден читател со посебна смисла за црн хумор предлага да ја качиме нобеловката на коњ. Е, тоа би било, вели, полн погодок и најголем дострел на преродбата што не' снајде.