Репресираните Бугари се множат како печурки

Репресираните Македонци со бугарски пасоши се множат како печурки по дожд во земјава, па по паѓањето во заборав на Спаска Митрова, се вади од нафталин случајот со Мирослав Ризински, еден од неформалните лидери на декларираните Бугари во Македонија. Деновиве група бугарски јавни личности, бизнисмени, научници и културни работници испратија отворено писмо до државниот врв во Софија, барајќи да го стави под заштита Ризински, кој бил жртва на политичка репресија и монтиран корупциски случај во нашата држава. Вчера се огласи по истиот повод и Културниот центар на Бугарите во Македонија, практично еден ден пред одбележувањето на годишнината на Тодор Александров и пред најавеното доаѓање на радикалот Красимир Каракачанов. Ризински, кој бил член на партијата на Доста Димовска, во 2007 година бил уапсен за земање 6.000 евра мито, но во јавните апели се тврди дека бил наместен и дека неговата вистинска вина е што бил силен заштитник на бугарската самосвест во земјата и еден од организаторите на одбележувањето на годишнината на Мара Бунева што заврши со тепачка.

Директна причина за реакцијата, наводно, е фактот дека македонското Министерство за правда одбива да и' го предаде Ризински на бугарската држава, па веќе издржал половина од затворската казна. Како и во случајот со Митрова, во реакцијата се користат оцените на ЕУ, на Стејт департментот и на Советот на Европа за судството во Македонија за да се тврди дека процесот против Ризински бил пристрасен иако под превезот на независно судство. „Според Уставот, секој бугарски државјанин, каде и да се наоѓа, е под заштита на Бугарија и не може со леснотија да биде предаден на друга држава за кривично гонење“, стои во реакцијата до официјална Софија, иако прашањето може да се постави и обратно, бидејќи Ризински има бугарско, но и македонско државјанство. (Н.Р.)