(ФОТО) Владата на Груевски доби доверба

Пратениците ја отфрлија иницијативата на СДСМ за изгласување недоверба на Владата со 68 гласови „против“ и 42 „за“

ФОТО: Киро Попов

Со 68 гласови „против“ и 42 „за“ пратениците доцна вечерва ја отфрлија иницијативата на СДСМ за изгласување недоверба на Владата, со која сакаа да покажат дека владината криза е смислено сценарио меѓу ВМРО- ДПМНЕ и ДУИ. На крајот од дебатата се обрати премиерот Никола Груевски кој рече дека разликата меѓу него и Бранко Црвенковски е токму во тоа што СДСМ се гледа низ призмата на сценарио, фингирана криза и политички игри. Тој потсети на настаните во Гостивар со кои Црвенковски сакал да ја сокрие девалвацијата и на случајот кога Агим Красниќи го држел во заложништво Скопје, за да соктијат катастрофалните економски состојби.

„Имаме принципиелни разлики кои се` уште постојат. Гестот во Слупчане беше контрапродуктивен и ако целта беше помирување тоа не се сфати така, туку како предизборна провокација. Промената на таблите на училиштата е акт на провокација. Се демонстрира непочитување на Уставот и законите. Интонирањето на албанската химна може да се смета за провокација. Раните од 2001 не се залечени и мораме да бидеме претпазливи“, рече Груевски.

Вакви настани се случуваа и претходно, но се` доби посилен интензитет по грозоморниот настан кај Смилковското езеро, рече Груевски и повтори дека не планира да биде премиер по секоја цена. Нагласи дека треба да се донесе Законот за бранителите, но со него не треба да бидат опфатени борците на ОНА.

„Јас не посакувам предвремени избори, но доколку Парламентот изгласа недоверба на Владата јас сум подготвен за избори, со препораките на ОБСЕ. Ние веруваме во народот и неговите вредности“, рече Груевски. (Т.П.)