ВМРО-НП: Додовски ги однесе списоците во А1

Поранешните сопартијци го обвинија довчерашниот лидер дека тој ги однел во А1 листите со административците кои дале гаранција дека ќе гласаат за ВМРО-ДПМНЕ

Наум Котевски


Во вжештената политичка атмосфера, полека откажуваат сите сопирачки кај некогашната икона на ВМРО-ДПМНЕ Љупчо Георгиевски, но и кај неговите некогаш блиски соработници, а сега политички противници. Се напаѓа без пардон од сите страни, а јавноста може само да претпоставува кому таа „бестежинска состојба“ ќе му се удри од глава.

ВМРО-НП извади вчера уште неколку пикантерии од „шишето на вистината“, како одговор на нападите од трибината на институтот „Димитрие Чуповски“, каде што Марјан Додовски, довчерашниот „истомисленик“ на Георгиевски, кажа дека бившиот премиер уште во 2004 година најавил можна коалиција со СДСМ.

„Македонската јавност треба да знае дека токму Додовски е најзаслужен за обелоденувањето на аферата со списоците на гласачи од државната администрација. Тој лично ги однесе информациите во веќе згаснатата А1 телевизија. Со тој подвиг се обелодени една тешка афера на сегашните негови сопартијци“, тврди Слободан Близнаковски од раководството на ВМРО-НП.

Аферата со гласачките списоци во државната администрација, пред парламентарните избори минатата година, ја обелоденија новинари на А1, кои со лажно претставување на телефон се обидоа да докажат дека владејачката партија бара од вработените во државните институции да достават список со по 15 лица кои со сигурност ќе гласаат за ВМРО-ДПМНЕ. Истражувачката сторија ја реализираа новинарките Наташа Стојановска и Сашка Цветковска, кои ни потврдија вчера дека првин добиле список со имиња, по што контактирале со некои од лицата на списоците, претставувајќи се како претставници на Центарот за комуникации на ВМРО-ДПМНЕ. Низ тие телефонски разговори се покажа дека сите контактирани се согласиле да ги дадат своите лични податоци како гаранција дека ќе го задржат работното место и дека за таа цел ќе гласаат за ВМРО-ДПМНЕ.

„Точно е дека едно лице ни го даде списокот. Ниту јас, ниту колешката Сашка, ниту, пак, некој друг новинар од тогашната А1 што знае повеќе за случајот нема да го открие неговиот идентитет. Можам само да ви кажам дека кога тајно се сретнавме, кај лицето лесно се забележуваше страв“, вели Стојановска, која смета дека целиот случај е позитивен општествен момент, иако Јавното обвинителство се изјасни дека нема доволно елементи за поведување истрага.

Според Стојановска, доставувачот на списокот немал сигурно лоша намера, туку сакал да се открие вистината за притисоците во администрацијата. И таа и Цветковска за професионално изработената задача почувствуваа лична сатисфакција - ја добија наградата за Најдобра истражувачка сторија за 2011 година од Македонскиот институт за медиуми.

Очекувано двете новинарки не сакаа да го откријат изворот, па сега му останува на Георгиевски тоа да го докаже. Неговата партија вчера не застана само на аферата со списоците. Според ВМРО-НП, Додовски уште во 2007 година бил главен преговарач со СДСМ и иницијатор за рушење на владата на Груевски.

„Во текот на 2009 година на иницијатива на Додовски, во ресторанот ’Окарина’, имавме серија средби со Игор Ивановски од СДСМ и со други високи функционери од таа партија. Од 2009 година до 2012, повторно на иницијатива на Додовски, ја спроведувавме агендата окрупнување на опозицијата и имавме преку пет средби со градоначалникот на Карпош, Стевче Јакимовски, во скопскиот ресторан ’14 -ка’“. „Индивидуалните месечни посети на Додовски во кабинетот на градоначалникот Стевче Јакимовски продолжија“, велат од ВМРО-НП, потсетувајќи го Додовски дека лично тој од говорница среде кампањата за предвремените парламентарни избори 2011 истакнал дека ќе се прави коалиција со СДСМ.