Агендата 2014 се' уште е во сила

Атина - Грција и покрај кризат�� планира да остане посветена на Агендата 2014 за помош на државите од Западен Балкан за побрз пристап во ЕУ. Новиот замени-министер за надворешни работи Димитрис Куркулас за време на неговото излагање на конференцијата на „Економист“ во Атина истакна дека Грција и во актуелните услови е одлучена да има важна и позитивна улога во Европа и соседството, споменувајќи дека Агенда 2014 е дел од тој план. Куркулас потенцираше дека економската криза не претставува пречка за Грција да води динамична надворешна политика која ги почитува националниот суверенитет и меѓународното право.

Според говорот на новиот заменик-министер, Грција планира за време на нејзиното претседателство со ЕУ да ги интензивира обидите за промовирање на идејата за проширување на ЕУ со државите од Западен Балкан. Овој бран проширување на ЕУ за Грција е најдобар начин да се постигне мир и стабилност во регионот.

Без конкретно да ја спомене Македонија, Куркулас во својот говор индиректно посочи дека Грција ги поддржува аспирациите за членство во европското семејство на сите балкански држави под услов да се задоволат критериумите за добрососедски односи. „Ќе продолжиме да ја поддржуваме европската перспектива на сите држави од Западен Балкан, дури и на оние со кои постојат значајни несогласувања, барајќи од нив имплементирање на реформите и придржување до критериумите за добрососедски односи“, истакна Куркулас. (М.П.)