06.10.2011, 14:14 Фетел сака да ја освои титулата со стил
Шампионот ќе атакува на подиумот в недела во Сузука, иако му треба само еден поен.
Себастијан Фетел вети дека ќе ја освои својата втора титула во Формула 1 со стил, и покрај тоа што ќе му биде доволен и пласман на 10. место во трката за Големата награда на Јапонија в недела за да ги одбрани шампионските почести. Победникот на девет од досегашните 14 трки сезонава даде на знаење дека има намера да го почне славењето на подиумот во Сузука, наместо само да го собере потребниот еден бод од последните пет трки.
„Сакаме да го направиме тоа на вистинскиот начин“, изјави 24-годишниот возач на Ред бул, победник од пол-позицијата на патеката во сопственост на „Хонда“ во последните две години. „Сметам дека, ако имате способност, целосен пакет за да поминете добро тука, треба да го искористите и ако ви се укаже можност да завршите на подиумот - да го сторите тоа. Да, би имало причини за славење дури и ако завршиме десетти, но тоа не би било тоа. Според тоа, ние ќе се обидеме да се тркаме како и секогаш и ќе се обидеме да го дадеме најдоброто од себе“.
Единствениот возач што може да го спречи Фетел да стане најмлад двократен светски првак в недела е Џенсон Батон од Мекларен. За да го направи тоа, тој ќе мора да победи во Сузука, а во исто време Фетел да не освои ни поен прв пат во последните 17 трки, почнувајќи од октомври минатата година.
Батон не мисли дека работите ќе се одвиваат токму така, но ужива во фактот дека тој останува единствената закана за сништата на Фетел. Германецот, кој на прес-конференцијата седеше веднаш до светскиот првак од 2009 година, нагласи дека „се' уште има шанса Џенсон да ја освои титулата, а јас не“. Тој ја повтори познатата мантра дека стои цврсто на земја, приоѓајќи и' на секоја трка во дадениот момент.
„Во моментот кога ќе решите да летате, порано или подоцна доаѓа и моментот кога ќе се најдете долу исто така“, предупреди Фетел. „Така мора да биде. Ништо не лета засекогаш“.
Тој исто така низ смеа сугерира дека, ако некој сака да му направи услуга, тогаш би можел да го турне Батон низ скалите кога ќе излегува. Британецот, пак, зјапаше наоколу низ просторијата, барајќи со поглед дали воопшто има некој што поверува во ненадејната загриженост на Фетел.
„Мислам дека е извонредно тоа што Себастијан влегува во трката со помислата дека јас имам шанса да ја освојам титулата. Тој е можеби единствениот тука или единствениот воопшто што зборува така. Се' е речиси готово“, изјави Батон.
„
|
