Снежен хаос низ Македонија

Алармирани се сите кризни штабови и зимски служби низ државата. Снежни виулици го нарушија секојдневното живеење во нашата држава. Има прекин во наставата, отсечени села и исклучени сообраќајници од употреба. Според метеоролозите, снегот ќе продолжи да паѓа

Бојан Шашевски


Зимата покажа заби. Низ земјава завладеа вистински снежен хаос. Минусните температури ги замрзнаа коловозите и тротоарите, обилните снежни врнежи го блокираа сообраќајот, го оневозможија приодот до високите лизгави предели и отсекоа голем број села, со што го загрозија и снабдувањето со основни продукти на дел од жителите. Насекаде се забележува сообраќаен метеж и нервозни возачи, особено на раскрсниците. Опремени со капи, шалови, дебели јакни и ракавици пешаците се побрзи од автомобилите. Повторно масовно се доцни на работа, а голем број ученици, по препорака на надлежните или од страв на родителите, се враќаат во своите домови.

Алармирани се сите кризни штабови и зимски служби низ државата. На помош на механизација на претпријатијата им се придружија и газдите на локалните продавнички. Камионите расфрлаа индустриска сол по црните точки - подвозниците, надвозниците, мостовите, високите места со цел што побрзо да се отстрани новиот снег од коловозите. Неколку пати беше предупредено дека нанесената сол нема ефект на минус 5 Целзиусови степени, па ситуацијата ги задолжи сите месни заедници, куќни совети и сопственици на фирми да го расчистуваат снегот од покривите и од приодите кон своите објекти.

Интензивните снежни врнежи драстично го отежнаа, забавија и на места го оневозможија патничкиот и железничкиот сообраќај. Беше воведена забрана за движење на тешки возила на планинскиот премин Стража, на патниот правец Дебар - Струга, кракот Маврово - Дебар и Тетово - Попова Шапка, а Меѓуградската автобуска и Железничката станица соопштуваа за доцнења на поголемиот број од своите регуларни линии.

Во скопскиот регион стигнуваа информации за големи снежни наноси и магла на патниот правец од селото Кучевиште кон селата Танушевци, Малино и Брест. На мака беа и локалните жители и надлежните претпријатија, бидејќи многу населени места беа комплетно отсечени. Со вакви проблеми се соочија жителите од селата Селце и Белушино од Битолско, Руница и Алашавце од општина Липково и десеттина села во Старо Негоричане. Силните врнежи го прекинаа чистењето на снегот до селото Каврак во Кратовско, а го оневозможија и пробивањето до селото Дренал во Кривопаланечко, Подлес во Градско, Цера и Саса во Штипско, но и до селата Кладник, Присовјани, Збажди, Ржанови, Локов, Селци и Дренок во охридскиот регион. Најверојатно ќе се чистат во претстојните денови.

Снежната покривка на Кожуф порасна до 217 сантиметри, во еден континуиран зголемувачки тренд низ текот на денот. Дел од зависниците од адреналин и туристите мораа да го фатат патот под нозе кон хотелите и домовите. Според Управата за хидрометеоролошки работи, на Маврово беа регистрирани 98 сантиметри снег, 80 во Штип, 77 во Лазарополе, 60 во Пожаране, 55 во Крушево, 30 сантиметри во Тетово и во Дебар... Синоптичарите предвидуваат слично време и во наредните денови. Некаде дури ќе има и пообилни снежни врнежи и зголемување на покривката за 30 сантиметри, со силен ветер и со температури кои ќе се спуштат и до минус 20 Целзиусови степени.

Се чини дека на снегот најмногу му се израдуваа земјоделците. По долгото лето и сувата есен, насадите и акумулациите конечно ќе добијат соодветно количество вода. Притоа, може да заборавиме и на опасноста од апсолутен минимум за водата за пиење.

Аеродромите затворени