Чудото во „Свети Димитрија“ било повик за покајание

„Чудото со самопрочистувањето на фреските во црквата ’Свети Димитрија’ е повик на македонскиот народ за покајание“, оцени вчера во Велес, митрополитот повардарски Агатангел. Тој посочи дека многу години има служено во црквата „Свети Димитрија“ во Скопје и знае во каква состојба била таа и кога слушнал за настанот, веднаш во понеделникот отишол да го види чудото.

„Оние кои веруваат во чудата Божји, ова е Чудо Божјо и повик кон целиот македонски народ за единство. Ова е повик за спас на нашата држава, спас за нашата нација“, истакна митрополитот Агатангел. Тој притоа им упати апел на верниците да одат и да се поклонат на она што се случува во црквата каде што се упокоени и двајцата поранешни поглавари на МПЦ Доситеј и Ангелариј. Порача и дека ние како народ и како црква треба да дадеме поддршка на оние кои раководат со државата, како и да ја сакаме и да ја почитуваме црквата и да се молиме се' што се случува да биде на добро за нас како македонски народ. „Ова е чудо Божје и повик кон целиот македонски народ за единство. Треба да си ја сакаме и почитуваме црквата и да се молиме се' што се случува да биде на добро, да биде добар знак за нас како македонски народ и нашата држава Република Македонија“, порача од Повардарската епархија во Велес, митрополитот Агатангел. (П.Р.)