Пратеник на „Златна зора“ ветува ќотек за името Македонија

Ќотекот ќе се случел во парламентот ако не им се допадне предлогот за име на Македонија

Атина - Кандидатот за пратеник на „Златна зора“, Илијас Панајотарос, предупреди дека ќе има ќотек во грчкиот парламент доколку владата бара да се дискутира за решение за името на Македонија што нема да им се допадне.

„Ќе им го покажеме како предупредување видеото од ТВ Антена (видеото во кое портпаролот на ’Златна зора’, Илијас Касидиарис, напаѓа две пратенички во емисија во живо по расправија за изборите), па ако не го разберат, тогаш ќе им го објасниме“, изјави членот на неонацистичката партија. Панајотарос, слично како и неговиот сопартиец Касидиарис, кој покрај нападот на пратеничките треба да одговара на суд и за напад на студент од 2007 година, веќе има полициско досие. Последна црна дамка во неговото досие е нападот на имигранти во Атина минатата недела, во кој покрај него беше приведена и ќерката на лидерот на партијата Никос Михалолиакос. Меѓутоа, и Панајотарос и Касидиарис засега се извлекоа од затвор. Касидиарис поднесе тужби и против пратеничките и против телевизијата, обвинувајќи ги дека ја инсценирале дебатата за да извлечат таква насилна реакција од него. Насилството и почитта кон останатите партии од страна на „Златна зора“ се сведени на минимум откако нивниот лидер на митинг во Солун вербално ги навреди сите грчки политички лидери, почнувајќи од претседателот и премиерот, па се' до лидерката на Комунистичката партија Алека Папарига, која поради нејзината височина ја нарече „џебен болшевик“.

Битката да се исчисти грчкиот парламент од неонацистичките пратеници продолжува интензивно во сите медиуми. Лидерот на ултранационалистите ЛАОС, Јоргос Караџаферис, кој на минатите избори не успеа да влезе во парламентот, се надева дека оние кои гласале за „Златна зора“ ќе сфатат дека тоа не е партијата која мислеле дека е - и нема повеќе да гласаат за неа. (М.П.)