Во струшко спречено поставување на јарбол со македонско знаме



Жителите на струшкото село Мислешево денеска на мирен протест го искажаа незадоволството од решението за отстранување на бетонскиот столб каде треба да се постави јарбол со македонското знаме.

Пред околу еден месец, тие ја започнале изградбата на постаментот, по претходно одобрување од страна на сопственикот на местото каде што планираат да го подигнат јарболот.

Стрезо Јовчески од месната заедница во Мислешево вели дека до него стигнало решението за отстранување на бетонскиот столб од страна на општинските инспекциски служби. Според него, оваа иницијатива нема никаков етнични или верски предзнак кој би имал цел да предизвика немири кај целокупното население.

- Ова не верско знаме или друго знаме кое поттикнува предрасуди, туку македонско државно знаме во приватен посед. Почнавме да градиме. Дојдоа од инспекција, градскиот архитект и уште двајца и ни рекоа да прекинеме со работата. Не сметаме никому. Им кажав дека на 28 ноември цела Струга беше преплавена со албански знамиња и затоа ние ќе го истакнеме македонското знаме. Кога може во Обединети нации да се вее македонското знаме, зошто да не може во Македонија. Ќе го браниме нашиот став. Изборите нека си течат, немаме ништо против. И ДУИ и другите партии имаат македонски гласови одовде, вели Јовчески.

Сопственикот на местото Ѓорѓи Трифуноски каде е планирано да се подигне јарболот со македонското знаме не бил досега информиран дека местото му е одземено. Тој најави дека за ваквиот однос ќе покрене судска постапка кон државата.

- Во 1983 година кога бил премерот, бесправно ми е земено местото без да ме прашаат. Поминале, и како што им текнало, го запишале на Република Македонија. Тоа е мој личен имот. Ова е јарбол. Ќе си го вратам местото и ќе покренам судска постапка, вели Трифуноски.

Од локалната самоуправа во Струга појаснуваат дека има два начина за регулирање на ова прашање и тоа граѓанска иницијатива која мора да помине низ повеќе филтри или пак да се достави официјално барање до надлежните општински служби.

- По правило, иницијативата треба да помине пред Советот на општината, да ја разгледаат одредени комисии. Врз основа на стручно мислење, согласно постојните законски прописи да се одговори соодветно на иницијативата, дали ќе се прифати или нема да се прифати. Ако се работи за барање за одобрение за градба сигурно дека службите постапуваат согласно со Законот, појаснува секретарот на Општина Струга, Зоран Гулицоски.

Од месната заедница во селото Мислешево велат дека јарболот ќе биде висок околу дваесет метри и заедно со македонското знаме ќе бидат поставени непосредно пред локалните избори.