09.02.2013, 12:03 Битка за второто место во групата Ц
Македонскиот и словенечкиот првак имаат по десет бода, а првата средба во Скопје ја добија „металурзите“ со 30:23
Роберт Димитриевски
Развојот на настаните во групата Ц од Лигата на шампионите ги доведе ракометарите на Металург во слична позиција како минатата година - повторно првакот на Словенија им е директен конкурент за второто место и повторно одлуката паѓа на гости. Лани македонскиот шампион ремизира во Копер, но на крајот заврши зад Цимос, па во осмина финалето ја доби Кроација осигурување Загреб и беше елиминиран, а сега на патот му се испречува Горење. Во денешниот дуел од 16,30 часот во Велење двете екипи влегуваат со по десет бода, а во првиот меѓусебен дуел на стартот од натпреварите во групата „металурзите“ славеа со 30:23 во Скопје. Но, Словенците се во предност поради домашниот терен не само во денешната средба, туку и во последното коло против лидерот Кјељце, кој два пати го совлада Металург, а на Горење ќе му гостува без повредените хрватски репрезентативци Иван Чупиќ, Мануел Штрлек и Денис Бунтиќ.
„Ќе сториме се' за да го обезбедиме второто место уште во Велење. Ќе се бориме како лавови“, порача преку клупскиот сајт десниот бек Ренато Вугринец, кој заедно со сонародникот Миладин Козлина очекува жежок дочек од сонародниците. „Како ракометар на Целје учествував во многу дерби-натпревари со Горење. Станува збор за врвна екипа, која секогаш оди на победа. Салата прима околу 3.000 гледачи, не' чека суператмосфера. Мене, како поранешен играч на Целје, нема да ме дочекаат пријателски. Ќе има се' и сешто, но јас сум навикнат на тоа“.
Нема да му биде лесно ниту на тренерот Лино Червар, кој се пожали дека екипата му е на 60 проценти од потребната форма по исцрпувачкото Светско првенство во Шпанија, каде што деветмина негови играчи беа дел од македонската репрезентација, а по еден на Србија и на Црна Гора. Тоа дојде до израз на гостувањето во Белорусија минатиот викенд, каде што Металург загуби со 28:26 од Брест Мешков во СЕХА-лигата. Горење, пак, во средата пред своите навивачи го порази Цимос со убедливи 35:28 и се зацврсти на чело на табелата со три бода повеќе од Целје и со осум од тимот од Копер.
„Горење игра брз ракомет, со брз центар, ќе се обидат да не' претрчаат. Играат дома, каде што се посебно силни. Фаворити се, но и ние имаме свои квалитети. Се надевам дека ќе имаме добар ден и оти среќата ќе ни биде наклонета“, додава Вугринец.
Тој и неговите соиграчи очекуваат поддршка од околу 150 македонски навивачи во салата „Рдеча“, од кои 60 „пирати“ ќе дојдат со автобус од Скопје, а останатите се наши иселеници од Словенија. Екипата ја посети и македонскиот амбасадор во Љубљана, Игор Попов.
Натпреварот ќе го водат унгарските судии Ференц Бониферт и Виктор Олах.
|
