05.02.2013, 13:34 Мари бара трпение за Надал
Шпанецот се враќа на турнирите утре во Чиле, а Британецот смета дека можеби ќе му треба време за да достигне врвна форма
Енергијата што Рафаел Надал вообичаено ја носи со себе на теренот можеби ќе треба малку време за да се врати кога Шпанецот конечно ќе го почне својот кам-бек во Чиле неделава, смета третиот светски рекет Енди Мари. Сардисаниот од повреди Надал нема одиграно меч уште од шокантниот пораз од аутсајдерот Лукаш Росол на Вимблдон минатиот јуни, но денеска ќе го тестира своето проблематично колено во Виња дел Мар, каде што на земјениот терен ќе му излезе на мегдан Аргентинецот Гвидо Пелја или квалификант. Тенисерот што е на 92. место на АТП-листата во нормални околности би бил лесен плен за 11-кратниот грендслем-шампион, но Мари смета дека Надсал би можел да биде ранлив кога ќе треба да забрзува.
„Може да ја нема истата енергија цело време, а можете да очекувате и луѓето во првите неколку месеци додека тој не се врати на своето високо ниво да мислат дека би можеле да го изненадат“, објаснува Британецот. „Но, со тек на време, посебно ако Рафа ги освои првите три турнири по враќањето, се' ќе се смени и ривалите повторно ќе бидат загрижени од дуелите со него. Луѓето се плашат кога победувате и имате самодоверба“.
И покрај свежото враќање од повредата на коленото што се' уште му задава болка, публиката ќе очекува Шпанецот да се врати во топ-форма брзо. Мари, меѓутоа, повикува на воздржаност, иако очекува Надал да биде во доволно добра форма за осма титула на Ролан Гарос во јуни.
„Очекувањата ќе бидат големи и луѓето ќе очекуваат тој веднаш да прави се' како порано, но би можело да потрае недели, па и месеци додека тој биде повторно стариот“, вели Мари. „Тој тренира веќе месец и половина и беше под притисок за Австралија опен пред да се разболи. Ако победи на некои мечеви низ Јужна Америка и ако е физички океј до Ролан Гарос, ќе биде во добра форма“.
Во случај Надал, кој падна на петтото место на АТП-листата, во почетокот се мачи со формата, Мари ќе избие како сериозен претендент за трофејот во Париз.
„Верувам дека имам шанса да го освојам Ролан Гарос“, изјави Мари, чиј најдобар резултат на тој турнир е полуфиналето во 2011 година, кога загуби од Надал. „Но, за да го сторам тоа треба да се подготвам и да го искористам секој ден најдобро што можам. Имам шанси таму. Во тенисот се случувале понеобични работи од таа играч од првите четири или пет во светот да го освои Ролан Гарос“.
|
