05.02.2013, 12:58 Леброн држеше час по кошарка
Со одличната реализација од поле 13/14 „кралот“ се погрижи Мајами да го победи Шарлот (94:89) и да избегне голем срам
Леброн Џејмс се погрижи неговиот Мајами да избегне пораз од најслабиот тим во НБА-лигата Шарлот. Благодарение на неговите 31 поен и за малку перфектен шут од поле 13/14, како и осумте скока и исто толку асистенции бранителот на шампионскиот прстен во „Америка ерлајнс арена“ славеше со 94:89. Избраниците на Ерик Споелстра долго време се мачеа за да го скршат отпорот на составот кој до сега има скор од 11 победи и 36 порази. Покрај одличната игра на „кралот“, добро одигра и Крис Бош. Крилниот центар на Мајами застана на 23 поени, Двејн Вејд додаде 20 поени, но имаше катастрофална реализација.
По неочек��ваниот пораз во Кливленд вицешампионот Оклахома својот бес го истури врз Далас на домашен терен, го порази со 112:91.
Без повредените Крис Кејман и Винс Картер гостите немаа доволно сили достојно да им се спротивстават на Кевин Дурант и Расел Вестбрук, кои заедно со останатите соиграчи во еден период од мечот имаа позитива од 33 поени. Вестбрук со 24 поени беше прво име кај Тандерси, зад него беше Дурант со 19 поени и десет скока, а добра партија покажаа Кевин Мартин со 17 и Серж Ибака со 12 поени.
Гостувањата, очигледно, не им одат од рака на Лос Анџелес Клиперс. Кошаркарите на стратегот Вини дел Негро, кој запишаа трет пораз во низа надвор од својот „Стејплс центар“, овој пат немаа решение за Вашингтон (98:90). Од друга страна, на триумфот на Визардси не може да се гледа како на сензација бидејќи нивниот противник играше без Крис Пол, а во последен момент на листата на повредени влезе и Блејк Грифин. Вака хедикипираниот тим од Калифорнија немаше расположен кошаркар за да го повлече својот тим.
„Ова навистина е фрустрирачки бидејќи го расипавме она што го остваривме на стартот на сезоната. Но повредите не можеме да ги контролираме. Ќе видиме каква ќе биде ситуацијата со Блејк пред наредниот меч, тогаш ќе ја донесеме одлуката за неговиот настап. Очекуваме до крајот на гостинската серија да се вратат Пол и Билапс, планот е Билапс да се врати пред Крис“, изјави Вини дел Негро.
Мартел Вебстер кај домаќинот беше човекот од одлука. Некогашниот бек на Портланд и Минесота кошот на Клиперси го наполни со 21 поени (пет тројки). Во отсуство на Пол и Грифин диригентската палка кај тимот од Лос Анџелес ја имаше Џамал Крафорд, неговите 28 поени беа премалку за триумф.
Резултати: Индијана - Чикаго 111:101, Филаделфија - Орландо 78:61, Вашингтон - Лос Анџелес Клиперс 98:90, Мајами - Шарлот 99:94, Њујорк - Детроит 99:85, Оклахома - Далас 112:91, Минесота - Портланд 98:100, Јута - Сакраменто 98:91.
|
