Отфрлен предлогот пратениците да имаат обезбедување

Пратениците од владејачкото мнозинство денеска не го прифатија предлогот на нивниот колега од НДП Изет Зеќири пратениците да имаат право на лично обезбедување од едно лице вработено МВР.

- Предлагам пратениците да имаат право на лично обезбедување од едно лице вработено во организационата единица за обезбедување на лица и објекти во Министерството за внатрешни работи, зашто се изложени на ризици преку работата во Собранието која се пренесува директно на телевизија, изјави Зеќири на денешната Комисија за политички систем и односи меѓу заедниците. Според него, по настаните што се случија на 24 декември минатата година, се покажа дека собраниското обезбедување не може да ги заштити пратениците.

Пратеникот Зеќири го критикуваше носењето на повеќе закони по скратена постапка, меѓу кои, и оној со кој се предидува обезбедување за поранешен претседател на Владата.

- Со овој предлог се нема цел да се подобри законот, туку да се иницира политичка дебата, а тоа е лицемерие. Мнозинството пратеници никогаш не ни помислиле да побараат обезбедување, возврати пратеникот на ВМРО-ДПМНЕ, Илија Димовски.

Неговиот партиски колега, пак, Илија Китановски, смета дека со предлогот пратениците се изложуваат на подбив.

Пратеничката на ДУИ, Ермира Мехмети, оцени дека измените што ги предлага нејзиниот колега од НДП се неприфатливи зашто „со нив се создава слика дека во Македонија нема демократија, па пратениците треба да се кријат зад телохранители“.