Грахамер: Македонија да се подготви и во јуни да ги почне преговорите со ЕУ



Македонија пред изготвувањето на пролетниот извештај на ЕК да направи се што може за подготовка на преговорите и да не дава причини за критика

Европската иднина на Република Македонија е јасна и земјата во јуни реално и без одлагање треба да ги почне преговорите за членство во ЕУ. Македонија пред изготвувањето на пролетниот извештај на ЕК да направи се што може во врска со подготовка на овие преговори и да не дава причини за критика. Таа мора да демонстрира дневен политички живот, да покаже дека е држава што треба да ја интегрираме во ЕУ. Унијата не треба да увезува проблеми.

Ова го истакнува австрискиот амбасадор во ЕУ Волтер Грахамер, меѓу другото, во интервју со дописникот на МИА од Брисел.

Грахамер потенцира дека може лесно да се затвори и прашањето за името, правејќи споредбата со Белгија каде што има провинција Луксембург и соседната земја што го носи истото име, а тоа не создава проблем. Поддршката, пак, што неговата земја и ја дава на Македонија за почеток на пристапните преговори за членство во ЕУ, се должи на историјата, геополитиката и економскиот интерес, но пред се, на тоа што Австрија сака да има мир во соседството што може да се гарантира со нивна интеграција во Унијата.