(ФОТО) Кинезите го прославија пристигнувањето на Змијата 

Лунарната нова година, позната и како Кинеска нова година, почнува на 10 февруари и годинава е во знакот на змијата

Кинезите ја дочекаа Лунарната нова година, позната како Кинеска нова година, со голем огномет низ улиците ширум земјата, и покрај исклучително ниските температури.

Апелот на градоначалникот да се користат помалку петарди поради големата загаденост на воздухот во Пекинг, не вроди со плод.

Се верува дека огнометот и петардите ги истеруваат лошите духови и го привлекуваат богот на изобилството на денот на пристигнувањето на Новата година.

Лунарната нова година, инаку ја обележува и најмасовната миграција на луѓе во светот, кога стотици милиони работници тргнуваат на пат за да ги поминат празниците со семејството. Поради тоа, речиси половина од популацијата на Пекинг, кој има 20 милиони жители, го напуштила градот за време на празникот.

По повод преминувањето од година на змејот во година на змијата, една од најнеомилените животни на светот, чувствата се различни. Змијата во Кина, според преданијата, се поврзува со мудроста, убавината и паметта, но и со вообразеноста и бесот.