ВМРО-ДПМНЕ: Неосновани обвинувањата од опозицијата за УЈП

Денешните напади врз УЈП се тотално неосновани и без никакви докази, истакнува ВМРО-ДПМНЕ во писмената реакција на денешната изјава на Горан Мисовски.

- Во последниот извештај на Европската Комисија за напредокот на Република Македонија, кој беше оценет како најпозитивен досега, токму УЈП беше посочена како институција која забележа напредок во работењето и позитивни оценки во борбата со криминалот и корупцијата. УЈП денес е пример како треба да работи една институција во согласност со законите и санкционирајќи ги сите оние кои пробуваат да ги прекршат, се наведува во реакцијата.

Според партијата, за работата на УЈП во времето на СДСМ најдобро говори правосилната судска пресуда за поранешната директорка Петра Митева која надвор од законските постапки купувала деловен простор во зградата Тифани.

- ВМРО-ДПМНЕ и понатаму ќе продолжи да ги поддржува сите институции кои работат во согласност со законите и принципите на една правна држава која сака да се бори со криминалот и корупцијата, поле на кое Република Македонија секоја година добива најпозитивни оценки од страна на меѓународниот фактор, се вели во реакцијата.