Актерката Беличанец изненадување на ВМРО-ДПМНЕ за Кисела Вода

Актерката Билјана Беличанец-Алексиќ е изненадувањето на градоначалничката листа на ВМРО-ДПМНЕ за престојните локални избори. Популарната Хурем од серијата „Величествениот“ ќе се обиде да ги придобие гласовите во Општина Кисела Вода и да го замени досегашниот градоначалник Марјан Ѓорчев. Како фаворит на партијата на власт до неодамна се споменуваше пратеникот Веле Ѓорѓиевски, иако и Ѓорчев сакаше нов мандат.

Извршниот комитет на ВМРО-ДПМНЕ на неделната седница утврди уште 11 кандидати за градоначалници. Во Кичево поддршка му е дадена на актуелниот прв човек на општината, Благоја Деспотоски и таму поради шареноликата национална слика и спојување на неколку општини во градското јадро, се очекува тешка битка меѓу партиите од македонскиот и ал��анскиот блок. Изненадувачки е и изборот на младиот портпарол на Министерството за надворешни работи, Борче Стамов, кој ќе трча во Дојран. Петре Латиновски ќе оди на нов мандат во Бутел, пратеникот Ванчо Апостолов ќе се бори во Неготино, а Љупчо Блажевски во Демир Хисар. Досегашниот градоначалник на Зелениково, Веле Груевски пак ја доби довербата од партијата, како и Горанчо Пановски во Чашка. Пратеникот Стефче Трпковски е адутот за Сопиште, Игор Поповски за Пехчево, Зоран Минов за Карбинци и Благој Јованов за Конче.

„Основен вредносен принцип според кој се раководевме, беше понудата на квалитетни програмски решенија во сферата на ифраструктурниот, стопанскиот и економскиот развој на општината. Освен тоа, значаен критериум при изборот на кандидатот беше и неговиот личен кредибилитет и досегашен придонес за општината за која се кандидира“, велат од ВМРО-ДПМНЕ.

Во наредните денови се очекува партијата на Груевски да ги соопшти имињата и на преостанатите кандидати, меѓу кои најмногу интерес привлекуваат Штип, Струга и Кавадарци. (Г.А.)