Цел Брисел во Македонија

Освен европарламентарците и Ричард Ховит, денеска во земјата повторно дојде „невидливиот“ Стефано Санино

Слободанка Јовановска

Не знаат за насилното исфрлање од Парламентот, а знаат дека имало над 1.500 амандмани за да се блокира буџетот. Не го виделе видеото, ама знаат кој е виновен што нема политички дијалог, а има политичка блокада.

Вака некако изгледаше прес-конференцијата на европарламентарците од сродните на ВМРО-ДПМНЕ народни партии во Европскиот парламент, кои денеска дојдоа да ни помогнат да се надмине политичката криза, а немаа договорено воопшто средба со опозицијата туку само со државниот врв.

Нивната главна порака беше дека опозицијата треба да се врати во Парламентот, зашто вака пораката што ја праќа до Брисел е грешна и ќе стане пречка за добивањето преговори. Тие беа предводница на медијаторската мисија на известувачот Ричард Ховит, но и на директорот во Директоратот за проширување Стефано Санино, кој дојде повторно денеска напладне и имаше бројни средби со претставници на владејачката коалиција и опозицијата. И овој пат се правеа обиди посетата на Санино да остане тајна, наспроти нападната гласност што ја доби последните денови таа на Ховит, иако неговата преговарачка улога е многу помала.

До кога ќе остане Санино и што носи во ракав никој не сакаше да соопшти, но упорното непотврдување на датумот на посетата на еврокомесарот Штефан Филе на 19 февруари од страна на Брисел е сигнал дека за да се оствари таа, Санино мора нешто да постигне. Сите тие, заедно со амбасадорите во земјата, ќе се обидат неделава да направат доволен меѓународен притисок да не пропаднат изборите, да не биде негативен извештајот на ЕК и во јуни да не отпадне препораката за преговори со Македонија.

(Повеќе во печатеното и електронското издание на Утрински Весник)