Македонскиот филмски фонд на собир во Израел

На меѓународниот собир од утре ќе учествуваат претставници од 20 фондови, од кои 10 се од земји членки на ЕУ

Македонскиот филмски фонд од утре до понеделник ќе учествува на меѓународниот собир на филмски фондови што ќе се одржува во Израел, заедно со претставници од 20 филмски фондови, 10 фондови од земји членки на ЕУ и 10 од земји што не се нејзини членки. Собирот организиран од организацијата АЦЕ (Ateliers du Cinema Europien) и Израелскиот филмски фонд е замислен како работилница за размена на најдобрите искуства. Најавено е одржување и на разговори за договорите на Светската трговска организација и нивниот потенцијал на влијание на системот на финансирање на филмови, а на дневен ред меѓудругото ќе биде и поддршката за дистрибуција на филмови како и автоматската поддршка. Најдобрите искуства ќе бидат дефинирани, а се очекува да се постават и клучните елементи за остварување на целите за подобар развој и соработка меѓу фондовите.

Според директорот на Фимскиот фонд Дарко Башевски, Македонија на собирот ќе го претстави својот систем на поддршка за филмовите изграден како компилација на собрани искуства од над 20-тина филмски фондови.

„Кај нас е направена компилација клучно земена од искуствата од Австрија и Израел. Процедурите на давање на поддршка за развој и она што се вика враќање на средства кај нас е унифицирано сосема поинаку од другите земји“, истакна на денеска одржаната прес- конференција Башевски.