„Изгубени Германци“ утревечер премиерно во МНТ

Претставата е работена по текст на Дејан Дуковски, а режисер е Слободан Унковски, чија последна претстава во овој театар беше поставена во 2005 година

Катерина Богоева

Театарската претстава „Изгубени Германци“ работена по текст на Дејан Дуковски, а во режија на Слободан Унковски, е третата претстава на овој потврден тандем, која премиерно ќе биде изведена утревечeр во Македонскиот народен театар во 20 часот. Досега тие ги реализираа и претставите „Буре барут“ и „Другата страна“.

Со оваа претстава, воедно, режисерот Унковски се враќа, по осумгодишна пауза на сцената на МНТ, по поставув��њето на последната претстава „Црнила“ во 2005 година.

„Претставата зборува за генералните состојби во македонското општество, не толку политички, колку етички. Цврсто е закопана во 1944 година, но идеите кои се обидува да ги артикулира се многу современи, актуелни“, рече вчера режисерот на одржаната прес-конференција која предизвика очекувано внимание кај медиумите, како што и самото споменување на текстот на Дуковски предизвикуваше внимание во јавноста месеци наназад.

Во неа улогите ќе ги толкуваат актерите: Камка Тоциновски, Тони Михајловски, Никола Ристановски, Ѕвезда Ангеловска, Јовица Михајловски, Јордан Симеонов, Оливер Митковски, Сања Арсовска и Емил Рубен, дел од кои вчера го споделија задоволството од меѓусебната соработка и од соработката со Дуковски и Унковски, гледајќи на претставата и како на голем предизвик за проверка или потврда на своите професионални квалитети.

Костимограф и автор на целиот дизајн на претставата е Бојана Никитовиќ од Белград, кореограф е Кренаре Невзати-Кери, а сценограф Виктор Михајлов.

Дејството во драмскиот текст кој режисерот Слободан Унковски го нарече „крајно необичен и специфичен“ се одвива во Македонија во 1944 година во еден рудник, кој би можел да биде и Алшар, каде што изгубени Германци божем истражуваат некаква руда, но е текст кој говори за една актуелна етичка состојба исто така во Македонија.

Претставата, посочи Унковски, говори за човечките мани, за фрустрациите, за алчноста, љубовта, за хомосексуалноста, нацизмот, за левичарството, за смислата на животот и др. Но тој напомена и дека тоа се само дел од базичните, болни прашања што таа ги третира. „Текстот е крајно специфичен, необичен, инспиративен, допира до хаосот и вознемиреноста на нашето општество. Нема да ги задоволи апетитите за евтини дневнополитички определби и насочувања зашто во суштина се однесува на судбината на обичниот човек“, рече режисерот, кој напомена дека претставата би можел да ја наслови и како „Изгубени Германци - трагична разврска со пеење“.

Тој го нарече Дејан Дуковски „македонскиот современ Чехов“, а актерската екипа многу сериозна, во професионалниот пристап.

„Станува збор за доста возбудлив материјал, кој доста говори за нашиот сегашен миг како нација и држава“, рече меѓу другото Унковски, укажувајќи дека „Последните Германци“ е прва вистинска, целовечерна драма на Дуковски без фрагментарна драматургија, но и дека му е многу драго што е поддржана оваа македонска драма, бидејќи „без македонска драма не може да се говори за македонски национален театар“.

Драматургот Дејан Дуковски, кој исто така не го криеше задоволството од досегашната работа на претставата, посочи дека првично неговата идеја за текстот му била врзана за филмско сценарио, а подоцна ја добила сегашната форма.

„Овој текст е многу поразличен од моите досегашни. Има поспецифична, отворена структура. Исклучително сум задоволен од реализацијата, сепак, ми е многу важно како ќе помине и искрено, имам трема“, рече Дејан Дуковски.