Измените на Деловникот за суспендирање на демократијата

Од СДСМ нагласуваат дека измените на Деловникот во отсуство на опозицијата потврдува дека во Македонија нема демократија

СДСМ денеска оцени дека со предлогот на ВМРО-ДПМНЕ за измени на Деловникот за работа во Собранието ќе се овозможи поефикасно суспендирање на демократијата.

- Собранискиот деловник е алатка која на пратениците им обезбедува фер правила за политичка и демократска дебата. Суштината на овој деловник е да ја обезбеди и осигура демократската дебата во рамките на Собранието и со тоа да ја зачува демократијата во земјата од евентуалните злоупотреби на извршната власт, изјави потпретсед��телот Гордан Георгиев.

Тој додаде дека во демократските општества ваков документ се носи со консензус на сите партии и оти обидот да се донесат измени на Деловникот во отсуство на опозицијата потврдува дека во Македонија нема демократија.

Во врска со предлогот на претседателот Ѓорге Иванов за формирање на експертска комисија за надминување на кризата, Георгиев истакна дека ваквата иницијатива е прифатлива само ако таа биде дел од пакетот за предвремени парламентарни избори.

Според него, со политичка волја и политички договор меѓу власта и опозицијата, остварливо е барањето за предвремени парламентарни избори, иако се поминати сите законски рокови за тоа.

Најави дека ќе продолжи и ќе се засилува отпорот низ улиците во Скопје и другите градови во државата се додека власта не сфати дека единствен излез од политичката криза се фер и слободни предвремени парламентарни избори.