05.02.2013, 15:51 Почнува собирањето средства за обнова на Трескавец
Во манастирот Трескавец од изутрината се констатира состојбата и почнa истрагата за причините за катастрофалниот пожар во кој изгореа конаците.
Целото прилепско стопанство, без исклучок ќе ги стави сите ресурси на располагање, финансиски и човечки, за да се возобнови манастирот Трескавец, што изгоре во вчерашниот пожар, заклучи бизнис секторот на денешната вонредна седница на Економскиот совет на Прилеп.
Општината од локалниот буџет веднаш ќе издвои еден милион денари, кои пред се ќе се искористат за расчистување на изгорените конаци на манастирот Трескавец кои настрадаа во пожарот, соопшти градоначалникот на Прилеп, Марјан Ристески, кој воедно е и претседател на Економскиот совет.
- Прво треба да се утврди фактичката состојба во манастирот и да се утврдат причините за пожарот. Увидните екипи се веќе на местото, изјави Ристески.
Ќе се направи и план за расчистување на теренот, а од Прилеп се упатуваат препораки до Владата, Министерството за транспорт и врски, Заводот и музеј и Министерството за култура, што поскоро да изработат основен проект со кој ќе се знае колку ќе чини возобновувањето на Манастирот.
- Да забрза изградбата на патот до манастирот, проект од 1,5 милиони евра на Министерството за транспорт и врски и на Владата. Тоа ќе овозможи забрзување на работите. Министерството за култура и МПЦ да отворат посебна жиро сметка за сите добронамерници да донираат средства, рече Ристески.
Според Симон Наумоски претседател на УО на „Витаминка“ сите ќе помогнат во обновата, но, смета тој, за да се доведе во реална состојба Манастирот сигурно ќе поминат барем три години.
Пожарникарите, полицијата и дел граѓани останаа ноќеска, а побројно пристигнаа уште изутрината за да понудат помош. Прилепчани, за кои Трескавец има посебно значење, и за жал, го имаат искуството со големиот пожар од пред 23 години кога исто до темел беа уништени конаците, се мобилизираат и овој пат.
Министерката за култура Елизабета Канческа Милеска најави дека денеска до владата ќе биде доставена итна информација за манастирот, за веднаш да се подготви план, а и потоа проект за обнова на уништеното.
- Остана срцето на манастирот. Црквата од 13. век е спасена како и трпезаријата од 14 век, рече владиката Климент.
|
