По Виена, Скопје пие најчиста вода во Европа

Имаме бистра и санитарна вода без радиоактивни елементи, без никакви бактерии и органски материи

Бојан Шашевски

„После жителите на Виена, скопјани ја пијат втората најквалитетна вода во Европа. Во изминатите 50 години нема никакви докази дека постоело било какво загадување или проблем со питката вода во Скопје, а сигурно најмалку уште толку градот ќе располага со чиста вода. Изворот Рашче сигурно ќе живее колку и Скопје. Имаме бистра и санитарна вода без радиоактивни елементи, без никакви бактерии и органски материи. Граѓаните слободно можат да ја пијат водата што ја добиваат преку нашето претпријатие“, рече директорот на ЈП „Водовод и канализација“, Ст��јан Србиновски при посетата на Центарот за санитарна контрола во Карпош 4.

Овој Центар преку три модерни лаборатории врши редовен мониторинг на скопската питка вода, 365 дена во годината. Вработените на дневна база земаат примерок од 36 мерни точки низ градот, а потоа ги носат на анализи во Центарот. Мерните места се одредени според бројот на еквивалент живели на Скопје. „Водовод“ има можност квалитетот на водата да го следи во микробиолошка и хемиска лабораторија, а располага и со лаботорија за површинските и отпадни води, како и со служба за санитарна контрола и надзор. Со опремата лаборантите мерат присуство и отсуство на органски и неоргански материи, испитуваат анеони на вода, токсини, тешки метали...

„На софистициран начин постојано проверуваме и докажуваме дека и најмала капка вода не содржи жива. Испитуваме вода која ја пијат 700.000 луѓе, па потоа со мирна совест си одиме дома“, вели еден од постарите лаборанти во Центарот за санитарна контрола.

Неговата колешка од Лабораторијата за отпадни води потврдува дека засега нема механизам за во целост да се следат површинските и отпадните води, но тоа во голем мера треба да се реши со изградба на пречистителната станица која ќе ги собира скопските фекални води и ќе му дава на Вардар високопрочистена вода.

„Секоја вода има 4 класи според параметрите за квалитет. Не е тајна дека Вардар е прилично загаден и се наоѓа на 3 или 4 класа, односно вон класа“, велат од Центарот.

Директорот на „Водовод“ тврди дека досега немаат пронајдено штетна вода низ сите 36 мерни места. Вели, хлорот уништува се' што е органско, но сепак, мораат да вршат дополнителни анализи.

„Некаде се појавуваат технички проблеми со цевки, но никогаш не бил доведен во прашање квалитетот на питката вода. Нашиот систем е под притисок и кога ќе влезе во цевките на мрежата нема можност да излезе на површина, оди директно до домовите. Лидери сме во Македонија за модерни испитувања во полето на акватиката. После Скопје, и во Велес, Кочани и Струмица има високософистицирани стандарди за анализирање на водата за пиење“, вели Србиновски, потенцирајќи дека наплатата на водата оди доста добро, со мали исклучоци.