09.02.2013, 11:19 Меккејн ја поддржува Македонија за членство во НАТО
„Сенаторот е докажан пријател на Македонија и се интересираше за сите прашања поврзани со нашата држава“, изјави претседателот на Собранието, Трајко Вељаноски
Делегацијата на македонското Собрание, која е во посета на Соединетите Американски Држави, ја заврши посетата со средба со сенаторот Џон Меккејн, претседателскиот кандидат на Републиканската партија на изборите во 2008 година.
Претседателот на Собранието Трајко Вељаноски, по средбата со Меккејн, изјави дека влијателниот сенатор ја подвлекол неговата поддршка за македонското членство во НАТО, која ја имаше искажано и пред самитот во Чикаго минатата година.
- Џон Меккејн е докажан пријател на Македонија и се интересираше за сите прашања поврзани со Македонија. Му упативме покана за посета на нашата земја и рече дека со задоволство ќе ја прифати во догледно време. Секогаш од него имаме поддршка за членството во НАТО, дури укажа дека ќе лобира кај Сенатот, Претставничкиот дом, кај неговите колеги за Македонија, изјави Вељаноски по средбата.
Вељаноски и Меккејн, јави дописникот на МИА од Вашингтон, зборуваа за спорот за името меѓу Македонија и Грција, при што македонската страна истакна дека има искрен пристап во спорот и се залага за решение кое е прифатливо за двете страни и е долгорочно одржливо.
Претседателот на Собранието Вељаноски му се заблагодари на сенаторот Мекејн за целокупните заложби и поддршка која САД и ја укажуваат на Република Македонија.
Делегацијата, во која се и пратениците Владимир Ѓорчев и Александар Спасеновски, имаше работен појадок со експерти и аналитичари на конзервативната фондација Херитиџ, на кој се разгледаа безбедносните состојби на Балканот, интеграциите и македонските економски реформи.
Херитиџ, во соработка со Вол Стрит Журнал, го изработува годишниот Индекс на економски слободи, при што експертите на Херитиџ го истакнаа високиот напредок на Македонија, на 43 место во светот, односно 21 место во Европа.
Македонската делегација се сретна и со Лорн Крејнер, директор на Меѓународниот републикански институт ИРИ, при што беше покренато прашањето за можна обнова на програмите на овој институт во Македонија.
- Финансирањето на проектот на ИРИ, за жал, е прекинато. Крејнер рече ќе го пренесе овој повик, за продолжување за повторно финансирање на одредени проекти во Македонија, на бордот на директори на ИРИ, изјави Вељаноски по средбата.
Во интервју за Гласот на Америка, Вељаноски упати апел до делот на опозицијата кој не учествува во работата на законодавниот дом да се врати во Собранието. Тој оценува дека нема расположение за уште едни предвремени парламентарни избори. - За сите отворени прашања, кои сметаат од нивна страна дека се отворени, подготвен сум и јас, како претседател на Собранието, и владејачкото мнозинство, да разговараме. За да се распишат вонредни парламентарни избори треба да има мнозинство од пратениците што ќе изгласаат таква одлука. Јас, како што знам, нема расположение од владејачкото мнозинство за вонредни парламентарни избори, затоа што испаѓа на секоја година или година и пол, да се организираат вонредни парламентарни избори, изјави Вељаноски.
|
