(ФОТО) Самба! Самба! Самба!

Со звуците на фанфарите и со конфети стартуваше најпознатиот карневал во светот – Карневалот во Рио де Жанеиро

Со звуци на фанфари и со конфети викендов стартуваше петдневниот, најпознат карневал во светот – Карневалот во Рио де Жанеиро. Дебелиот крал Момо го прими од градононачалникот на Рио, Едуардо Паес, симболичниот клуч од градот и го означи почетокот на карневалот. Градоначалникот му се поклони на кралот Момо, 150 кг тешкиот „симбол на се' што е претерано на карневалот во Рио“.

„Горд сум што ќе ја предводам оваа свеченост на петдневно лудило, прослава која е за цел свет. Го прогласувам карневалот во Рио де Жанеиро за отворен!“, изјави кралот Момо, инаку 33-годишен банкарски службеник, чие вистинско име е Милтон Родригез. Со него во друштво беа и кралицата на карневалот и двете принцези кои се избираат секоја година.

„Ова е најголема прослава на светот и понатаму ќе биде така, со повеќе мир и радост“, заклучи градоначалникот Едуардо Паес.

На улиците на Рио може да се видат најдобрите школи за самба чии претставници се менуваат на Самбадромот. Патеката по која маршираат е долга 700 метри.

Предвидено е до крајот на карневалот во центарот на Рио, на традиционалниот Самбодром, да минат околу 500 карневалски поворки на водечките танцови школи за самба во Бразил, кои ќе се натпреваруваат за титулата најдобра, претставувајќи ги пред јавноста костимираните импровизации на најразлични теми.

Учесниците за карневалот се подготвуваат цела година, а костимите и декорациите се на највисоко ниво и од нив застанува здивот. За победниците е резервирана парична награда. Атмосферата и на околните улици е одлична, се пее, се игра, се забавува. За зачувување на редот се ангажирани околу 14.500 полицајци.

Спектаклот во Рио секоја година мами милиони посетители од целиот свет. Оваа година се очекува бројка од околу еден милион туристи. Сенка врз големиот настан фрли трагичната несреќа, која неодамна се случи во бразилскиот ноќен клуб во Санта Марија, каде што загинаа 238 млади луѓе.