Аврамопулос со Бан Ки Мун, Самарас со Обама

Атина - Спорот за името ќе се најде следната недела на агендата на грчкиот шеф на дипломатијата Димитрис Аврамопулос. Аврамопулос ќе отпатува за Њујорк каде на 21 февруари во Обединетите Нации ќе има средба и разговори со генералниот секретар, Бан Ки-мун. Средбата на Аврамопулос со Бан ја потврдуваат и од грчкото Министерство за надворешни работи. Се очекува во фокусот на разговорите на двајцата политичари да се најде спорот за името, како и кипарското прашање кое е еден од приоритетите на грчката надворешна политика.

Шефот на грчката дипломатија последен пат имаше средба со генералниот секретар во септември за време на Генералното собрание на ОН, кога се сретна и запозна и со министерот Никола Попоски. На тогашната средба со Бан Ки-мун и медијаторот во спорот за името Метју Ним��ц, Аврамопулос потенцираше дека Грција има желба да преземе иницијатива за решавање на спорот за името, која еден месец потоа дојде во форма на грчкиот предлог Меморандум за соработка.

Под знак прашалник е дали Аврамопулос ќе изнесе некакви поинакви ставови и ќе внесе нов оптимизам при оваа февруарската средба со Бан Ки-мун, откако последната средба на преговарачите со Нимиц заврши без некакви резултати што би довеле до поместување. За потсетување, медијаторот најави нова средба, која според првичните шпекулации ќе биде во средината на март.

Најголемиот број коментари во Грција беа дека најголемиот притисок врз двете влади за побрзо решение го прават САД. Помошникот заменикот министер за надворешни работи, Ерик Рубин, кој деновиве е во официјална посета на Грција, не изоставил во грчкото Министерство за надворешни да разговара и за спорот за името. Според „Елефтеротипија“ Рубин и пренел на грчката страна дека пречка за решавање на спорот за името е ставот до кој се држи премиерот Груевски. Рубин имаше официјална средба со генералниот секретар на министерството, Василис Каскарелис, присуствуваше и на церемонијата на потпишувањето на договорот меѓу Грција, Италија и Албанија за Трансјадранскиот гасовод, а се шпекулира дека имало тајна средба и со лидерот на СИРИЗА, Алексис Ципрас, со кого имаше средба пред неколку недели за време на посетата на лидерот на левичарите на Вашингтон. Посетата на Рубин на Грција се оценува како загрижност од американска страна за негативните феномени во регионот, поточно иредентистичките и националистички појави кои се повеќе се прошируваат на Балканот, како и интерес за активностите во енергетскиот сектор. Освен ова, оваа средба имала за цел да го подготви теренот и за посетата на премиерот Андонис Самарас на САД и неговата средба со претседателот Барак Обама, за која се` уште не е одреден соодветен датум. (М.П.)